Un Vermú en Danza con Xosé Ambás y Cantaruxare, novedá de la Xira al Naranco

Va entamase el 30 de xunu y va contar tamién coles actuaciones de José Manuel Tejedor y La Tarrancha. Uviéu celebra amás estos díes L'Ascensión en dellos puntos del conceyu.

Per tercer añu siguíu entámase la Xira al Naranco, tradición que vien del 1929, que se perdió pola Guerra Civil, y que tres dellos intentos de recuperación nos 60 y 80 paez qu'agora torna a garrar fuercia. Manos por el Naranco y el Conceyu d'Uviéu organicen esta folixa que buscar caltener l'espíritu folixeru y social d'aquellos primeros años.

Los romeros van salir a les 11.30 hores de La Llosa del domingu 30 de xunu, cola posibilidá de facelo a pie o en bicicleta (11.45 hores), con reagrupación prevista al meudía en Samiguel de Lliño. Pa les persones que nun puedan percorrer tol trayeutu hasta l'área recreativa, el Conceyu entama autobuses especiales.

Nel Naranco va entamase animación infantil; cuentacuentos; visites guiaes a elementos etnográficos, como los pozos de nieve o los restos de la Guerra Civil; deportes rurales; y el tradicional Concursu de Pintura al aire llibre. Mentes, va haber camionetes de comida pa la xente que quiera mercar arriba dalgo pa picar.

No musical, va entamase un Vermú en Danza, con Xosé Antón Fernández 'Ambás' y Cantaruxare. Darréu van actuar José Manuel Tejedor y La Tarrancha.

Del vienres al domingu

Dende güei y hasta'l domingu Uviéu celebra L'Ascensión, la fiesta del campu qu'homenaxa a los homes y muyeres de la zona rural del conceyu.

Nel Recintu Ferial de La Llosa va haber espaciu pa l'artesanía, talleres, deporte tradicional  y carpas temátiques d'alimentación, etnografía, esposiciones y races autóctones. Tamién va haber tonada, actuaciones de bandas de gaites y grupos folclóricos, o d'artistes como Jerónimo Granda o'l propiu gaiteru Tejedor.

Na plaza Porlier, Campu San Francisco y Escandalera va instalase'l Mercáu Astur. Mentes, mañana, va tener llugar el desfile folclóricu, con salida a les 17 hores de la Plaza de la Catedral y final en La Llosa, onde la Colla de Castellers de Sarriá va facer una exhibición.

Pa consultar el programa completu de L'Ascensión pue calcar equí.

Na semeya, Ambás; Andrea Lobo, de La Tarrancha; Tejedor; Ana Taboada, vicealcaldesa en funciones; Carlos Fernández Llaneza, representante de Manos por el Naranco; y el deportista David González.