Uviéu centra los actos reivindicativos del Día de la Nación Asturiana

Esti vienres, 8 de setiembre, celébrase oficialmente’l Día de la Nación Asturiana. Como ye vezu nesta xornada, convóquense actos reivindicativos de calter soberanista, que van tener Uviéu como sede, mentes que’l Gobiernu entama una folixa en Llanera.

A les 12.30 hores ta convocada la marcha que la iniciativa #LluchandoPolaSoberanía vien organizando los años últimos col oxetivu d’axuntar a tol nacionalismu nun actu común. Ésta va salir del Paséu los Álamos baxo’l lema ‘Lluches vieyes pa un país nuevu’ pa percorrer les cais del cascu vieyu y finar na Corrada l'Obispu, onde va celebrase un actu políticu y una xinta popular.

La intención con esta esta convocatoria ye “amosar a la sociedá asturiana que l'apueste pola soberanía d'Asturies ye la manera de poner igua a los problemes del nuesu pueblu”. Yá de tarde, los miembros de #LluchandoPolaSoberanía van desplazase a Riosa pa instalar un puestín nel que se van esparder les demandes y el manifiestu de la movilización. Nesa xornada, coincidiendo cola llegada de La Vuelta a L'Angliru'l sábadu, va celebrase un conciertu con Faen Versión, Nuberu, La Tarrancha, Ochobre, Avientu y Skama la Rede, que va dar comienzu a les 19 hores.

Andecha Astur

A les 13.30 hores Andecha Astur va celebrar un actu propiu que va consistir nuna concentración na plaza la Catedral d’Uviéu, onde va entamase una referéndum simbólicu pa reivindicar el derechu a decidir d’asturianos y asturianes. Al empar, la organización nacionalista pretende asina denunciar "la situación que carecemos n’Asturies, onde se mos impunxo dende Madrid un ente autonómicu, el 'Principado', y un Estatutu d’Autonomía ensin permiti-y al pueblu asturianu’l drechu democráticu a pronunciase en referéndum, drechu que sí permitieron a gallegos, vascos, andaluces, catalanes..., y que fai de los asturianos y asturianes ciudadanos de segunda categoría".

PAS

El Partíu Asturianista (PAS) nun va ufrir esti añu’l tradicional homenaxe a Pelayo na xixonesa Plaza’l Marqués como fundador del Reinu d’Asturies. Sicasí, los sos militantes caltienen la xinta de xeremandía.

Podemos

El Muséu del Pueblu d’Asturies torna a ser el llugar escoyíu por Podemos pa celebrar el 8 de setiembre con una folixa popular. Les actividaes van principiar al meudía cola puesta en marcha d’una Feria del Llibru y el Discu, Ecoloxía y Artesanía, pa finar sobre les 22 hores tres les actuaciones d’artistes de La Caja de Músicos pa defender la música en direuto (comienzu a les 19.30 hores) y d’Akin And the Afrobeat Brothers, y siguir con DJ Pillastre.

Pentemedies va haber espaciu pa una grabación de ‘El Telar’ con Cristina Fallarás, Antonio Maestre, Yolanda Díaz, Daniel Ripa y Ana Taboada, prevista pa les 12.30 hores; talleres pa neños y neñes; una xinta popular; un concursu de postres caseros; cuentacuentos;  xuegos tradicionales; y conciertos de Patrulla Dixie y Salón Bombé, ente otres munches actividaes. Pa les 18.30 hores ta previstu l’actu central de la xornada, coles intervenciones polítiques de Mario Suárez del Fueyo, Rosario Hernández Catalán y Emilio León, a lo qu’hai que sumar la participación de representantes de Kellys Asturies, Serviciu d’Ayuda a Domicilio (SAD) Xixón y Muyeres de La Escandalera.

Izquierda Xunida

Izquierda Xunida nun va entamar actu concretu pal 8-S, anque programa pal xueves 7 y el domingu 10 actividaes al rodiu la Memoria Histórica coincidiendo con esta celebración, na que presenten la propuesta d’una Llei de Memoria Histórica Asturiana. Pela mañana, a les 11 hores, Baltasar Garzón va analizar nel Archivu Históricu d’Asturias la Llei de la Memoria Democrática y la Comisión de la Verdá, mentes que pela tarde, a les 17.15 hores, va facese una visita guiada y explicativa a la fosa La Canalona, na población praviana d’Agones, a cargu de voluntarios y miembros de l’Asociación para la Recuperaciónde la Memoria Histórica (ARMH).

El domingu, mentes, va tener llugar en Llaviana dende les 10 hores el sestu alcuentru Memoria y Futuro n’homenaxe a Manolín el de Llorío.

Gobiernu

Llanera, concretamente Llugo y les instalaciones de La Llamorgal, ye’l llugar escoyíu esti añu pa celebrar el Día d’Asturies pol Gobiernu. Al coincidir de vienres, nesta ocasión les actividaes van allargase tola fin de selmana, destacando’l mercáu tradicional y la feria de productos asturianos, una preba de sidra de baldre’l domingu (12.30 hores, parque Ovidio Libardón) y delles actuaciones musicales a lo llargo del día.

El vienres, na Casa Cultura de Llugo, van actuar Cerezal y Los Berrones dende les 20 hores, siendo’l turnu’l sábadu d’Anabel Santiago y Avalanch.