El Día de la Nación Asturiana llevó delles reivindicaciones sociales a les cais d’Uviéu

|
El Día de la Nación Asturiana llevó delles reivindicaciones sociales a les cais d’Uviéu

Siguiendo l’espíritu de la convocatoria del añu pasáu, la manifestación entamada por #LluchandoPolaSoberanía pol Día de la Nación Asturiana axuntó n’Uviéu delles reivindicaciones tres una mesma pancarta que rezaba 'Lluches vieyes pa un país nuevu'. Andecha Astur entamó un referéndum simbólicu darréu.

La marcha, que salió a les 12.30 hores del Paséu de los Álamos en direición a la Corrada l'Obispu, fixo cuatro paraes pa poder sentir discursos sobre delles problemátiques sobre les qu’afondaron la Ruta contra’l Racismu y la Represión; la Corriente Sindical d’Izquierda (CSI); los centros sociales Sestaferia, La Semiente, La Xusticia, Llar El Mataderu y Llar La Llegra; y Bujarra. Amás, sofitaron la convocatoria Darréu, la Xunta Estudiantil Asturiana, Andecha Astur, Conceyu Abiertu y la Plataforma de Afectados por la Hipoteca y Desahucios (PAH) d’Uviéu, interviniendo los dos primeros nel actu políticu previu a la xinta popular, nel que tamién se lleó’l ‘Manifiestu por una Asturies llibre del Plumeru de La Pampa y especies invasores’.

Mentes, #LluchandoPolaSoberanía recordó que “los problemes que sufre Asturies nun son de recién, pero paez que colos años nun faen más que medrar”, pa depués enumerar dalgunos de los más destacaos: la discriminación y acosu que sufren les muyeres, que “siguen morriendo a manes del patriarcáu ensin que les instituciones paezan ser quien a facer nada; el paru; la emigración de la mocedá; o la situación del mundu rural. “Paez que lo único que quieren de nós les que nos gobiernen dientro y fuera d’Asturies ye que quedemos pa país de postal, mui guapu pero ensin identidá. Mui atractivu pal turismu pero ensin futuru; un país nel que quede’l mínimu de persones pa caltener los chigres y los hoteles abiertos. Toes elles, por supuestu, trabayando en condiciones precaries”, afirma’l manifiestu ‘Lluches vieyes pa un país nuevu’.

“Les reivindicaciones que facemos güei son yá vieyes, nun son más que lo que pide cualquier pueblu: trabayu dignu, xusticia, igualdá, servicios públicos de calidá…”, apunten dende esti coleutivu, qu’entienden que la única manera de llegar a ellos ye al traviés de la soberanía: “soberanía pa xestionar los nuestros recursos; soberanía pa organizar el nuestru país; soberanía, como muyeres, sobre los nuestros cuerpos; soberanía pa solucionar estos problemes vieyos y construyir un país nuevu”. Por últimu calcóse en que ye’l momentu agora de “axuntase, de sumar lluches, d'organizase, lluchar pola soberanía y construyir el país nel que queremos vivir”.

Consulta sobre’l derechu a decidir

Andecha Astur instaló una carpa na plaza la Catedral con una urna pa que la ciudadanía pudiera participar nun referéndum simbólicu pa reivindicar el derechu a decidir d’asturianos y asturianes. Asina repartiéronse papeletes cola entruga ‘¿El Pueblu Asturianu tien qu’exercer el Drechu a Decidir, y escoyer llibremente’l so futuru, determinando’l tipu de gobiernu y l’ordenamientu xurídicu-políticu d’Asturies?’, cola opción ‘Sí’ y ‘Non’ pa marcar, cola fin de que tanto grandes como pequeños pudieren votar.

Enantes, Llucía Fernández repasó la situación d'Asturies anguaño, “con un Estatutu y una institución autonómica –el ‘Principado’– impuestos dende Madrid, ensin otru aquelli que llevar alantre les polítiques d'esfarrapamientu socio-económicultural d'Asturies col oxetu d'asimilala a un proyeutu d'Estáu que tien al nuesu país práuticamente como un barriu de Madrid  y que ta llevándomos a una situación d’auténticu xenocidiu, con decenes de miles d’asturianos obligaos a emigrar añu ente añu, y con otres tantes decenes de miles resistiendo en condiciones de paru y precariedá llaboral y social”, apuntaron dende Andecha Astur, que destacó la participación alta na consulta, tanto de persones qu’acudieron al actu como de les que se pasaben pel llugar nuna xornada festiva.

Otros actos

Podemos foi la única otra organización que convocó actos con motivu del Día d’Asturies. Asina axuntó a la so militancia nuna folixa popular con numberoses actividaes a lo llargo del día nel Muséu del Pueblu d’Asturies, destacando la grabación del programa ‘El Telar’, na que participaron Cristina Fallarás, Antonio Maestre, Yolanda Díaz, Daniel Ripa y Ana Taboada; y l’actu políticu, que tuvo les intervenciones de Mario Suárez del Fueyo, Rosario Hernández Catalán y Emilio León.

El Gobiernu, encabezáu por Javier Fernández, participó nos actos relixosos de Cuadonga pol Día de la Santina. Yá pela tarde, el presidente acudió a la fiesta entamada pol Executivu en Llanera y que contó con trés díes d’actividá desllucida per momentos pol agua que cayó na nueche del vienres y a lo llargo del sábadu, sobre manera.

Contador Estadistiques