Uviéu acueye la entrega de los Premios Princesa con movilizaciones nel esterior de Campoamor

|

El Teatru Campoamor va acoyer esti vienres, a les 18.30 hores, la gala d’entrega de los Premios Princesa de Asturias, cola presencia de los reis d’España. Na Escandalera ta convocada un añu más una concentración de protesta contra los gallardones y la monarquía, a la que se suma una pola xunidá d’España nel Paséu los Álamos.

La entrega del Princesa de Asturias de la Concordia a la Xunión Europea pese al tratu que se-y ta dando a los refuxaos provocó qu’esti añu les protestes se centren sobre manera nesta concesión. Asina, 148 organizaciones roblaron el manifiestu ‘Los premios de la vergUEnza’ y vienen entamando charres y actividaes estos díes, que van tener como eventu central la concentración na Escandalera a les 17 hores qu’entama les Marches de la Dignidá.

Esta convocatoria contra los premios y la monarquía nun va ser la única d’esti añu, yá qu’a la mesma hora a pocos metros, nel Paséu los Álamos, ta prevista otra concentración, nesti casu ‘Por la Unidad de España’. Nenguna organización ta representada nos cartelos que llamen a participar nella namái con “banderas de España constitucionales y banderas de Asturias”.

Gallardonaos

Los gallardonaos nesta ocasión colos Premios Princesa de Asturias son William Kentridge (Artes), Les Luthiers (Comunicación y Humanides), la Hispanic Society of America (Cooperación Internacional), los All Blacks (Deporte), Karen Armstrong (Ciencies Sociales), Adam Zagajewski (Lletres), Rainer Weiss, Kip S. Thorne, Barry C. Barish y la Colaboración Científica LIGO (Investigación Científica y Téunica) y la Xunión Europea (Concordia). El Premiu al Pueblu Exemplar, que s’entrega’l sábadu, foi pa Poreñu (Villaviciosa).

Contador Estadistiques