Usu na rotulación y na publicidá institucional o alcuerdos con empreses: propuestes pa facer política llingüística a costu cero

Iniciativa pol Asturianu ta acabante d’asoleyar l’informe ‘Propuestes de política llingüística a costu cero pa desendolcar no que queda de llexislatura’. La organización ufierta esti documentu, con proposiciones en doce campos que van dende la rotulación, la publicidá institucional, l’usu na RTPA o l’alcuerdu con empreses, como posible guía de trabayu hasta mayu del 2023

“Si se fai esti esfuerciu y se desendolquen estes propuestes de trabayu, llograríase dar un pasu alantre na normalización social del asturianu colos recursos esistentes”, apunten dende Iniciativa pol Asturianu. “Les propuestes son a costu cero”, añaden al tiempu qu’afirmen que “l’asturianu únicamente precisa voluntá de trabayu, d’esfuerciu y d’imaxinación. Ye’l momentu d’aprovechar el tiempu que queda de llexislatura y sacar alantre propuestes pa siguir normalizando l’idioma”.

El documentu incorpora delles propuestes en doce campos: rotulación; megafonía; publicidá institucional; empreses; RTPA; espectáculos; consideración del asturianu: empreses audiovisuales, compañíes de videoxuegos…; Cámara de Comerciu y Unión de Comerciantes; rules; Día de les Lletres Asturianes; y clubes deportivos. La mayoría d’elles afalen a alcuerdos y convenios con entidaes pa que l’idioma tenga presencia nes sos actividaes, amás del usu por parte de la propia Alministración o’l respetu de la toponomia oficial, ente otres aiciones.