Una visita accesible a la Llaboral y al cascu históricu d'Avilés, nes rutes pel patrimoniu

Yá tán a la venta los asientos pa los diez itinerarios previstos na tercer edición d'esti programa, con salida siempre dende Uviéu.

El Gobiernu incorpora una visita accesible a la Llaboral y al cascu históricu d'Avilés, prevista pal 28 de marzu pa facilitar la participación a persones con dalgún tipu de discapacidá inteleutual, física y sensorial auditiva o visual, dientro del III 'D'itinerarios pel patrimoniu', iniciativa entamada pola Sociedá Pública de Promoción Turística y Cultural del Principáu d'Asturies pa "dar más visibilidá y facilitar l'accesu de los visitantes al patrimoniu asturianu". Los percorríos son guiaos en castellanu y cuenten con un llargor de media xornada o día completu, con un preciu de los 15 a los 18 euros –12 y 15 pa neñes y neños de 4 a 11 años–, de manera respeutiva, con tresporte incluyíu.

La primer salida d'esti añu va ser el día 11, y va centrase nel Camín de Santiago pel so pasu pel occidente, con paraes n'A Veiga, Taramundi y Grandas de Salime, ente otres poblaciones, cola posibilidá tamién de facela'l 14 de marzu y el 16 de mayu. El Parque Natural de Somiedu, el 18 –tamién el 21 de marzu y el 30 de mayu– , y 'Cuadonga, ruta de les pelegrinaciones', el 21 –tamién el 9 de mayu– completen les d'esti mes.

El restu de rutes programaes son les siguientes: 'Prerrománicu asturianu: Uviéu y Valdediós' (1 de febreru y 23 de mayu), 'Prerrománicu asturianu: Uviéu y Ḷḷena' (8 de febreru y 11 d'abril), 'Pueblos marineros' (15 de febreru y 25 d'abril), 'Reserva Natural Integral de Munieḷḷos (22 de febreru y 18 d'abril), 'Patrimoniu industrial' (29 de febreru y 4 d'abril) y 'Arte rupestre pel oriente' (2 de mayu). Les inscripciones pueden facese de manera presencial al traviés de Curin Servicios Integrales de Turismo, de llunes a vienres n'Uviéu, y na rede nesti enllaz.