Una organización va sofitar l’espardimientu de la música asturiana nos Estaos Xuníos

Celtiberian Heritage Society ye’l nome d’una organización creada recién n’Estaos Xuníos cola fin d’espardir la cultura de raigañu celta de la Península Ibérica al otru llau del ‘charcu’, con un enfotu especial na música asturiana. El gallegu Bernardo Riveiro y otros emigrantes tán detrás d'esti proyeutu.

El tamién fundador nel 1971 y ex presidente del Centro Español de Queens llegó a New York nel 1955 y vien sofitando económicamente nos seis años últimos na presencia de bandes de gaites asturianes na ciudá con motivu del Saint Patrick's Day, con participación nel desfile pela Quinta Avenida pol 17 de marzu. “Los gastos de traer a les bandes de gaites son altos y les sociedaes españoles ayuden económicamente, pero non abondo. Asina que dellos collacios asturianos, gallegos y yo mesmu, creamos Celtiberian Heritage Society pa dedicanos namás a esti llabor, desendolcar un meyor trabayu y da-y más valor a daqué tan importante que tien que continuar”, esplica l’emigrante natural de Tui.

La Banda Gaites Llacín, que tuvo una gran repercusión estatal pola so interpretación del Himnu d’Asturies en Times Square, foi l’agrupación qu’acudió esti añu, con actuaciones amás n’otros puntos del estáu de New York y de New Jersey, inclusive nun conciertu de la xira estauxunidense del gallegu Carlos Núñez. L’ésitu d’estos eventos provocó pidimientos inclusive pa llevar tamién una banda gaites del país a Connecticut: “Producimos el discu de Slum Suit –grupu del gaiteru uviedín residente en Nueva York, Carlos Casado–, tamos preparando una nueche celta pa mayu, con un poco suerte tendremos a una banda asturiana equí n’ochobre y siguimos sofitando a la banda gaites La Mecigaya de Nueva York”, esplica Riveiro sobre los oxetivos próximos de la Celtiberian Heritage Society.

La gaita “ye reina”

La idea de poner en marchar esta organización llegó al percibir que siempre que la xente que vía bandes de gaites dicía “¡qué maravilla!’, pero toos s’entrugaben d’ónde yeren. Ehí decatéme del gran fallu: que dempués de tantos gastos y esfuercios pa venir a Nueva York, la xente nun sabía d’ónde veníen. Entós falé coles bandes y colos responsables de traeles, y lo primero que fici foi da-yos pancartes col nome la so banda y la so procedencia, pa facer la so información más visible. Dempués entamé a sofitales con tresportes, agospios, xintes… Porque vi un potencial mui granible pa espardir ente millones d’americanos daqué non conocío d’España y que diba acullá del flamencu”, relata Riveiro.

Enantes, yá dende’l Centro Español de Queens, Riveiro trabayara pa difundir la cultura de raigaños celtes. “Tenemos clases y banda de gaites gallega y asturiana, amás de grupu de baille. Organizamos nueches celtes y traximos a tocar a grupos como Luar na Lubre”, apunta’l de Tui, qu’añade que “dalgunos sectores de la sociedá española tovía faen de menos a la gaita, pero n’Estaos Xuníos la gaita ye reina: ta presente n’actos oficiales, desfiles o entierros”.

“Traer a les bandes ye caro y nos lleva trabayu enforma, pero paga la pena”, fina un ilusionáu Riveiro énte esta etapa nueva cola Celtiberian Heritage Society qu’afronta a los sos 72 años.

Na semeya, Riveiro xunto a miembros de Llacín.