El gaiteru emigrante Carlos Casado saca’l so primer discu con Slum Suit

|
El gaiteru emigrante Carlos Casado saca’l so primer discu con Slum Suit

La banda nacida en New York y formada pol gaiteru uvieín Carlos Casado y otros cinco músicos procedentes de Brasil, Turquía, Xapón y Catalunya, Slum Suit, ta acabante d’asoleyar el so discu debú. La Celtiberian Heritage Society encargóse de la edición del trabayu.

Slum Suit, que se pue tornar al asturianu como ‘traxe de les barriaes’, naz nel 2015 cuando Casado  reunió a dellos músicos –que nin tan siquiera vieren enantes una gaita– “col oxetivu de crear un soníu popular, modernu y tradicional que naciera de los instrumentos de persones mui alloñaes xeográficamente, pero qu’amosara que yera posible entendese ente cultures”. Tres tocar en direuto en sales, estaciones de metru, parques o festivales, con ésitu dada la so orixinalidá y conexón col públicu, editen agora un EP homónimu.

El discu inclúi cinco temes “que nun tienen lletra pero sí historia: les vivencies de seis inmigrantes na ciudá qu’enxamás duerme. Col protagonismu de la gaita y el folk, cada pieza d’esti trabayu ye un viaxe sonoru que tresporta hacia ritmos jazz, a guitarres rumberes, al baião de Brasil, a llinies musicales d’Oriente Mediu… Un impecable debut que lleva a la música de raigañu asturianu a territorios enxamás esploraos enantes, que ruempe con prexuicios culturales de toa triba y algama empastiar estos soníos de contraste. L’arguyu de lo propio y la guapura de lo estremao vistiendo’l traxe de les barriaes”.

La presentación oficial del trabayu, que yá ta disponible en formatu dixital en toles plataformes musicales, va tener llugar el día 15 nun conciertu especial nel Cunningham Park de Queens, onde residen tolos componentes de Slum Suit, xunto a la New York Philharmonic Orchestra, tres ser seleicionaos por esta formación de sonadía que celebra 175 años pa interpretar la pieza ‘Dvořák’s Symphony No. 9, From the New World’. El discu físicu, mentes, va distribuyise n’Asturies en dellos llocales del país a lo llargo d’esti mes.

La Mecigaya y Fuxida

Esti sestetu nun ye l’únicu proyeutu que tien entamáu Casado n’Estaos Xuníos. A lo llargo de la so estancia en New York fundó la primer banda de gaites asturianes nel país norteamericanu, La Mecigaya, y Fuxida, un dúu formáu xunto col cantante y guitarrista xaponés Tatsuo Teraoka col qu’actuó n’Asturies nel 2015.

Na semeya, Casado –terceru pela derecha– xunto col restu de los sos compañeros.

Contador Estadistiques