Una marca de ropa entama una campaña n’asturianu pa recordar a les güeles

#30DíesConRemangu ye’l nome de la campaña qu’entama Puru Remangu, marca de ropa y accesorios qu’emplega l’asturianu, pa conmemorar esti mes de marzu tiñíu de malva. Esta iniciativa que se desendolca n’Instagram per segundu añu ta dedicáu nesta ocasión a les güeles, con una historia personal cada día.

“La historia de les nuestres güeles, tamién forma parte de la nuestra. Nun dexemos que s'escaezan les sos vivencies, les aventures, les penuries d'una guerra. Fala con to güela, escribi la so historia”, llama Puru Remangu pa que les asturianes y asturianos les unvíen al corréu electrónicu pururemangu@gmail.com. Luisa, Saluda, Esther, Olvido, Carmina, Ángeles, Julia, Alicia y Teresa protagonizaron les primeres espublizaciones nes que se cuenten viaxes, emigraciones, trabayos o proyeutos personales.

Con #30DíesConRemangu, que na primer edición tuvo dedicada a muyeres asturianes que destacaben nes sos carreres profesionales, axúntase “reivindicación del papel de la muyer, arguyu de lo propio y normalización llingüística”, apunten dende esta marca que cuenta con 2.121 siguidores na rede social Instagram. Nesta ocasión, éstos emociónense de manera diaria “coles vides d'estes muyeres que, ensin dulda, nun dexen indiferente a naide”.