La segunda edición de ‘Güeli’ yá ta nes llibreríes tres escosar la primera de 500 exemplares en 20 díes

Con 500 exemplares vendíos en 20 díes, ‘Güeli. Histories d’amor y remangu’ convirtióse nun de los llibros más esitosos del 2020. Puru Remangu, marca de ropa qu’editó esta obra d'homenaxe a les güeles asturianes que nació de la campaña #30DíesConRemangu entamada n’Instagram, yá punxo a la venta la segunda edición.

Los testos asoleyaos nesta rede social emplegada por xente mozo sobre manera nun llegaben a tol mundu y la responsable de Puru Remangu, Enar Areces, vio nidio que nun podíen quedar namái nes páxines virtuales y que pagaba la pena llevalos a formatu físicu. Asina, tres facer una escoyeta con 35 de les histories nes que participantes nesta iniciativa falaben de la so güela y la so vida, nació ‘Güeli. Histories d’amor y remangu’.

El resultáu final foron 96 páxines nes que se pueden lleer vivencies como “deprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… Histories escrites dende’l cariñu, que representen a toa una xeneración y que gracies a esti llibru van quedar pa la posteridá”, apunten dende Puru Remangu.

L’esitu de ‘Güeli. Histories d’amor y remangu’ refléxase nos 500 exemplares vendíos en 20 díes dende que salió a la venta’l 9 d’avientu. Agora aporta a les llibreríes una segunda edición d’esti llibru homenaxe a estes “heroínes anónimes que criaron, educaron y llucharon por dexanos un futuru meyor” col que Puru Remangu, empresa ganadora del Pegollu de los XXXVI Premios Andrés Solar qu'entrega la Xunta pola Defensa de la Llingua Asturiana, pretende que les sos vivencies, contaes poles sos nietes y nietos, nun caigan nel escaezu.