Una ‘Caravana pola Oficialidá’ va dir dende Bimenes a Sotrondio como respuesta a los ataques al idioma

|
Una ‘Caravana pola Oficialidá’ va dir dende Bimenes a Sotrondio como respuesta a los ataques al idioma

La Xunta pola Defensa de la Llingua Asturiana (XDLA) entama esti domingu una ‘Caravana pola Oficialidá’ como respuesta a los ataques que vien viviendo l’idioma nos meses últimos. Va ser la primera aición d’otres munches previstes pola organización.

Los recursos de Delegación del Gobiernu a ordenances y reglamentos, les campañes mediátiques contra la recuperación de la toponimia y la parálisis na presencia de asturianu na radiotelevisión pública son dalgunos de los pilancos que ta atopando’l procesu de normalización de la llingua asturiana nos meses últimos. “Viose la necesidá de responder con actividaes movilizadores pa que la demanda de la oficialidá siga tando presente tol añu, más allá de les feches reivindicatives de siempre”, apunten dende la XDLA, que tamién busca “aprovechar y afitar los llazos de collaboración abiertos colos alcaldes y conceyales que participaron na iniciativa de Conceyos pola Oficialidá”.

La primer aición de les munches previstes ye una ‘Caravana pola Oficialidá’ pel valle del Nalón esti domingu, a la que s’anima a participar a la ciudadanía col so coche particular. Ésta va salir a les 10.30 hores de la Casa Conceyu de Bimenes, ayuntamiento pioneru na proclamación de la oficialidá, y va percorrer La Felguera, Sama, Ciañu y L'Entregu, p'acabar alredor de les 14.30 hores en Sotrondio.

Contador Estadistiques