Un viaxe del Paleolíticu a los maestros de la pintura asturiana n’asturianu

El sábadu comenzó’l proyeutu pilotu de visites guiaes en llingua asturiana al Muséu Arqueolóxicu y al Muséu de Belles Artes qu’entama Planificación Llingüística y Normalización. Dos numberosos grupos de persones siguieron atentamente les esplicaciones del guía oficial Denis Soria.

A les 11 hores taben convocaos nel Arqueolóxicu los ciudadanos que s’apuntaren pa partipar nel itinerariu inaugural, entituláu ‘Del Paleolíticu a Roma’. Asina, cerca de 25 persones pudieron conocer na so llingua propia de la boca de Soria detalles sobre esta época de la nuesa historia, una visita que nun dexó a naide indiferente.

La mayoría de los visitantes del Arquelóxicu repitieron depués na visita prevista nel Belles Artes, a la que se sumaron participantes nuevos. Nesta ocasión l’itinerariu escoyíu foi ‘Maestros de la pintura asturiana’, pudiendo conocer una docena d’obres de Carreño Miranda, Evaristo Valle, Alejandro Mieres o Nicanor Piñole.

La experiencia resultó gratificante pa tolos asistentes, que van tener la oportunidá de conocer percorríos nuevos de dambos centros museísticos el 17 d’avientu. La xente interesao en participar, de baldre, nestes visites pue acutar plaza nel númberu de teléfonu 985.10.19.15 o nel corréu electrónicu splnormalización@asturias.org.

Visites escolares

Un día enantes, el vienres, dellos colexos tamién van facer la mesma rutal, tal y como asocedió la selmana pasada. Nesa ocasión foron cinco los centros d’Uviéu que pudieron averase a la nuesa historia y al nuesu arte en llingua asturiana.