“Un país ha de priorizar la cultura, la formación, la llingua propia y la identidá; nun significa un gastu, sinón una inversión”, diz Portomeñe

|
Inaciu Galán y Víctor Manuel Vázquez Portomeñe nel II Seminariu Oficialidá

Víctor Manuel Vázquez Portomeñe, conselleiro por Alianza Popular y el PP de Galicia, encargóse de pesllar el II Seminariu ‘Oficialidá, el camín constitucional pal futuru del asturianu’ entamáu por Iniciativa pol Asturianu. “Un país ha de priorizar la cultura, la formación, la llingua propia y la identidá; nun significa un gastu, sinón una inversión”, afirmó ún de los impulsores de la oficialidá del gallegu.

L’Edificiu Históricu de la Universidá d’Uviéu repitió como sede d’un ciclu de conferencies y alderiques al rodiu de la oficialidá que volvió a destacar pola calidá de les intervenciones, con un bon númberu d’asistentes nes dos xornaes nes que se dividió. Ún de los principales atractivos yera la presenca de Vázquez Portomeñe, destacáu políticu gallegu que foi ún de los ponentes del Estatutu d’Autonomía del país vecín, conselleiro de Educación (1983-1986), de Relacións Institucionais (1990-1993) y de Cultura (1993-1996), y diseñador del Xacobeo 93.

La so ponencia foi siguida, ente otros, pol rector Santiago García Granda y el presidente de l’Academia de la Llingua Asturiana (ALLA), Xosé Antón González Riaño, que nun duldaron en pidir la pallabra tres la intervención pa felicitar a Vázquez Portomeñe pola so “argumentación tan llúcida y llucida”, como apuntó’l dirixente de la institución académica. El de Taboada comenzó afirmando que “la llingua ye un elementu fundamental de la personalidá histórica de la mio tierra”, pa depués repasar la historia del gallegu, dende’l sieglu XII, “cuando yera l’idioma de la poesía llírica de la Península Ibérica”.

Asina, rellató los cuatro sieglos d’escuridá “pol centralismu de Castilla” dende’l sieglu XIV hasta la Ilustración nel sieglu XVIII y el Resurdimientu, “tanto lliterariu como políticu”, del XIX. Tamién detalló’l sieglu XX, “de clarescuros”, con una primera etapa hasta los 40 de prosperidá, y destacó la importancia de la emigración gallega pa caltenimientu del idioma mientres el franquismu.

L’estatutu y la oficialidá

Darréu Vázquez Portomeñe centróse na época de creación de l’autonomía y na uninimidá que tuvo’l mesmu “tres un camín de renuncia y consensu hasta llegar a un puntu d’alcuentru”. Una situación “que sería estraña anguaño” que venceya col “espíritu de la Transición” y col fechu de que “yéremos conscientes de la responsabilidá que teníemos de la llingua como un elementu clave na conciencia histórica de Galicia”.

En definitiva, impuxéronse “los interesese xenerales de Galicia a los de los grupos políticos”. Nesi puntu citó a Camilo Nogueira, d’Esquerda Galega, y destacó la importancia que tuvieron nel desendolcu de la llingua gallega nesti sieglu Alfonso Daniel Manuel Rodríguez Castelao y Ramón Piñeiro, “que siempre quixo alloñar l’idioma de cualquier idea política”.

Asina’l políticu gallegu, que foi repansando tolos avances y alcuerdos pa la normalización del idioma basada nel “equilibriu nel usu de dambes llingües”, recordó que “cuando comenzó'l procesu d'oficialización y normalización ciertos grupos políticos quixeron aduañase de la bandera del gallegu. Otros grupos arrampuñamos-yla pa da-yla al pueblu gallegu, porque si non yera matar la llingua”. Agora, felicítase “pola coesistencia harmónica” del gallegu y castellanu nel so país, y pol fechu de que “el 89 por cientu de la población en Galicia ye billingüe; namái el 11 por cientu emplega namái’l castellanu”.

Sobre l’impautu económicu de la oficialidá, apuntó que “too gobernante debe priorizar en qué invierte. El mio criteriu ye qu’un país ha de priorizar la cultura, la formación, la llingua propia y la identidá; nun significa un gastu, sinón una inversión”.

Tamién faló’l del futuru de les llingües minoritaries nel marcu européu, citando la Carta Europea de les Llingües Minoritaries o Rexonales. “Esiste un horizonte de lluz pa les nueses llingües, p’afitales y aumentar el so usu. De nós depende”, finó.

Alderique con políticos

El rector encargóse d’inaugurar na tarde del vienres el seminariu, al que siguió la primer mesa redonda ‘Oficialidá, una cuestión pendiente na autonomía asturiana’, cola participación del socialista Antonio Trevín, presidente d’Asturies dende’l 1993 al 1995; Victoria Rodríguez Escudero, ex conseyera de Cultura mientres el mandatu del gobiernu popular de Sergio Marqués; l’ex diputáu d’Izquierda Xunida (IX) Francisco Javier García Valledor, ex conseyeru de Xusticia, Seguridá Pública y Rellaciones Esteriores mientres el Gobiernu de la FSA xunto con IX-Bloque por Asturies; y José Suárez Arias Cachero ‘Felechosa’, ex miembru del Conseyu d’Alminstración de RTPA por Foro y ex conceyal de Cultura n’Uviéu col PP.

Trevín fixo un apueste por un modelu de cooficialidá propiu p'Asturies apuntando que “la falta d'oficialidá ye un problema colectivu d'identidá”, mentes que Rodríguez Escudero recordó que l’aprobación de la Llei d’Usu y Promoción del Bable/Asturianu nun foi fácil –“Marqués tuvo mui claro qu’había qu’aprobala; fiximos lo que se podía facer naquel momentu–, y llamentó que nunca nun se desendolcara. Valledor, pela so parte, criticó que dicha norma “naciera desvirtuada” y afirmó que “Podemos ye agora mesmo la única garantía pa qu’haya oficialidá”.

Otra manera, Felechosa apuntó que “somos la semeya de la frustración y la incompetencia de la clase política”, y llamentó que “soi un votante de centroderecha que nun va poder votar centroderecha nes eleiciones”.

Restu d’interevenciones

La estrena del documental ‘El valir económicu d’una llingua’, nel que participó Fernando de la Fuente, direutor d’Asturies.com, foi otru de los momentos destacaos d’un seminariu qu’acoyó alderiques sobre la oficialidá en rellación cola actividá empresarial, los servicios de normalización, el sistema educativu y los medios de comunicación. Tamién Leopoldo Tolivar Alas, caderalgu de Drechu Alministrativu de la Universidá d’Uviéu, punxo la ponencia ‘L’asturianu nel marcu constitucional. ¿Por qué fai falta la oficialidá?’, na qu’apuntó que “tamos nel furgón de cola en derechos llingüísticos”.

Pa poner el ramu al eventu, los asistentes desplegaron una pancarta de 12 metros por 4 col lema 'La sociedá asturiana axúntase pola oficialidá, el camín de consensu constitucional'. Ésta tuvo sostenida por cargos de la FSA, Izquierda Xunida (IX), Izquierda Asturiana (IAS) y Podemos, ente ellos Lorena Gil, candidata de la formación morada a la presidencia d'Asturies; el rector de la Universidá d'Uviéu, Santiago García Granda; González Riaño, y la so antecesora na presidencia de l’ALLA, Ana María Cano; profesores universitarios; escritores; músicos; periodistes; ciudadanos; y militantes de tolos partíos con representación na Xunta Xeneral.

Na semeya, Inaciu Galán, presidente d'Iniciativa pol Asturianu, y Vázquez Portomeñe.

Contador Estadistiques