El seminariu d'Iniciativa va centrase en ‘reflexones y casos d’ésitu’ pa “dar lluz sobre les cuestiones que tán discutiéndose al rodiu la oficialidá”

|
Inaciu Galán y Sabel Tuñón presentación II Seminariu Oficialidá

L’ex presidente Antonio Trevín, el xurista Leopoldo Tolivar Alas y l’ex conseyeru y ún de los padres del estatutu gallegu Víctor Manuel Vázquez Portomeñe son dalgunos de los participantes nel II Seminariu ‘Oficialidá, el camín constitucional pal futuru del asturianu’. Ésti va tratar de “dar lluz sobre les cuestiones que tán discutiénsose al rodiu la oficialidá”, asegura Inaciu Galán.

La tarde del vienres y la mañana del sábadu l’Edificiu Históricu de la Universidá d’Uviéu va tornar a acoyer a espertos de dellos campos p’aldericar sobre la oficialidá del asturianu. La esperiencia del añu pasáu, con aforu completu y esperiencies mui arriquecidores, anima a Iniciativa pol Asturianu a repetir modelu nun momentu clave, a les puertes de les eleiciones del día 26, enfocándolu nesta ocasión en ‘reflexones y casos d’éstiu’.

El presidente del coleutivu va encargase d’inaugurar el II Seminariu ‘Oficialidá, el camín constitucional pal futuru del asturianu’ a les 16.30 hores en compañía, al igual que l’añu pasáu, del rector Santiago García Granda. Darréu va dase pasu “a representantes de tolos gobiernos qu’hebo n’Asturies a los llargo de los trenta y pico años d’autonomía, que van falar de cómo la oficialidá ye una cuestión pendiente; de les coses que se pudieron facer y de les que non”.

Asina, van sentase nesta mesa redonda’l socialista Trevín, presidente d’Asturies dende’l 1993 al 1995; Victoria Rodríguez Escudero, ex conseyera de Cultura mientres el mandatu del gobiernu popular de Sergio Marqués; l’ex diputáu d’Izquierda Xunida (IX) Francisco Javier García Valledor, ex conseyeru de Xusticia, Seguridá Pública y Rellaciones Esteriores mientres el Gobiernu de la FSA xunto con IX-Bloque por Asturies; y José Suárez Arias Cachero ‘Felechosa’, ex miembru del Conseyu d’Alminstración de RTPA por Foro y ex conceyal de Cultura n’Uviéu col PP. El títulu de la mesma va ser ‘Oficialidá, una cuestión pendiente na autonomía asturiana’.

Estrena de documental

Al igual que l’añu pasáu, va aprovechase l’escenariu pa presentar un documental. Si nel 2018 foi ‘La vida ensin oficialidá: les consecuencies de la falta de drechos llingüísticos n’Asturies’, nesta ocasión va centrase nes esperiencies y opiniones d’empresarios, economistes de delles universidaes y especialistes en marketing baxo’l títulu ‘El valir económicu d’una llingua’.

“Queremos amosar los testimonios de munchísimos empresarios y empresaries que n’Asturies vienen trabayando utilizando l’asturianu en munchísimos sectores, dende l’industrial al agroalimentariu, pasando pel sector servicios”, esplica Galán, qu’adelanta que na cinta va esplicase que “oficializar una llingua nun ye sólo un costu, sinón que tien una serie de beneficios arreyaos a ellos”, como la marca o identidá cultura que xenera. “La inversión revierte con creces”, añade.

Tres la proyeición, va entamase un alderique al respeuto. Nel mesmu van participar Noelia de Prado, xerente de La Cuadra d’Antón; David Coto, xerente de Sidra L’Allume; Silver Alonso, xerente de Cerveza Caleya; y Xicu Mata, xerente de Seguridá Asturcón.

Pa zarrar la primer xornada, Tolivar Alas, caderalgu de Drechu Alministrativu de la Universidá d’Uviéu, va poner la ponencia ‘L’asturianu nel marcu constitucional. ¿Por qué fai falta la oficialidá?’. “Va contantos sobre’l planu constitucional nel que desarrollen les oficialidaes al traviés del artículu 3.2 de la Constitución que ue desarrolla la cuestión llingüística”, adelanta Galán.

SNL, sindicatos, medios y Galicia

El sábadu l’actividá va principiar a les 10 hores y va centrase nos casos d’ésitu, con trés meses redondes. La primera entitúlase ‘El llabor de los servicios de normalización llingüística como esperiencia pa la oficialidá’ y nella va participar los responsables d’Avilés, Montserrat Machicado; Ḷḷena, Penélope Miranda; Cangas del Narcea, Mónica Rodríguez Riesgo; Ozcos-Eo, Andrea González González; y Corvera, Rafa R. Valdés.

Darréu va ser el turnu de los sindicatos, con representantes de los cuatro principales del mundu educativu. “Vamos intentar esplicar que too esto que nos tán contando de que tolos funcionarios diben a tener que deprender asturianu, que la oficialidá ye invasiva, nun ye asina; que n’Asturies tendremos un modelu propiu y qu’esta oficialidá vendrá a aportar llibertá”, apunta Galán.

Na mesa van participar Marta Mori, de Comisiones Obreres (CC OO); Maxi Fernández Otero, de FETE-UXT; Xosé Daniel Rodríguez Arias, de la Corriente Sindical d’Izquierda (CSI); y Emma Rodríguez García, del Sindicatu Unitariu Autónomu de los Trabayadores de la Enseñanza d’Asturies (SUATEA). Tres una posa, el siguiente alderique, va centrase nos medios de comunicación.

“Cuál ye’l papel que tienen que tener esos medios públicos y privaos, qué vienen faciendo y qué podríen facer cola oficialidá” va ser la temática de la mesa redonda. Nella, baxo’l títulu ‘El papel de los medios na oficialidá: el camín andáu’, van tar presentes Eduardo Lagar, de ‘La Nueva España; Miguel Rojo y Luis Arias Argüelles-Meres, de ‘El Comercio’; Xuan Cándano, de RTVE; Pachi Poncela, de RTPA.

Por último, pa pesllar el seminariu, va tener llugar “una intervención mui especial pa nós”. Va tomar la pallabra Vázquez Portomeñe, ún de los padres del Estatatu d’Autonomía gallegu, ex conseyeru d’Educación y Cultura con Manuel Fraga y ex senador del PP, que va falar de ‘El desarrollu de la oficialidá en Galicia, un modelu p’Asturies’.

“Va contanos cómo en Galicia se pudo desarrollar la oficialidá col consensu de la izquierda y la derecha; cómo’l Partido Popular al otru llau de la orilla del Eo tien una postura positiva y favoratible pa cola llingua propia; y cómo pue ser eso un modelu p’Asturies”, esplicó Galán, pa después añadir que “nosotros queremos siguir construyendo un consensu, queremos sumar al consensu de la oficialidá, como ya se sumaron una parte importante de los partíos, a los de centroderecha, al PP y Ciudadanos, y creemos que’l modelu de Galicia ye mui interesante nesi sentíu porque nestos 40 años nun hebo nengún tipu de conflictu y desarrollóse la oficialidá con normalidá”, tanto con gobiernos d’izquierda como del PP, munchos con mayoría absoluta. Nos mandatos populares “siguió llevándose alantre una política de normalización que fai que güei Galicia tenga una situación mui diferente a lo que tien Asturies, non sólo a lo que cinca a la cuestión llingüística, sinón que tamién la oficialidá del gallegu nun evitó que Galicia tuviera una situación económica muncho meyor que la nuestra, que siguimos en situaciones muncho peores de la que teníemos va 40 años”, afirmó’l presidente d’Iniciativa pol Asturianu.

Pancarta pola oficialidá

Pa poner el ramu, va facese una semeya coleutiva nel patiu del Edificiu Históricu de la Universidá na que va participar el rector, los asistentes al seminariu y representantes de la sociedá asturiana. “Vamos posar cola pancarta más grande que se desplegó nunca na cuestión de la oficialidá, de 12 metros por 4. Ésta va llevar ‘Oficialidá: La sociedá asturiana axúntase nel consensu pola oficialidá’ y quier ser un símbolu de lo que nos vamos xugar nes urnes. El futuru al final va depender de lo que decida’l Parllamentu asturianu, qu’haya o non reforma estatutuaria, y ye importante que se vea qu’hai un consesu, como dicen les encuestes y dicen tolos estudios, y como esperamos que digan les urnes el 26 de mayu”, apuntó Galán.

Sabel Tuñón esplicó darréu que la inscripción pal seminariu ye de baldre y que se pue facer rellenando un formulariu na web d’Iniciativa pol Asturianu. Tamién apuntó qu’a les 14.30 hores va entamase una espicha de pieslle nel chigre El Ferroviario, en Gascona, que tien un preciu de 30 euros, de 25 pa los socios del coleutivu.

“Va ser un seminariu, como l’añu pasáu, qu’intente dar lluz sobre les cuestiones que tán discutiéndose na sociedá asturiana y na clase políticu al rodiu d’esta cuestión de la oficialidá”, apuntó Galán, que, a entrugues de periodistes, puntualizó que “el mundu nun acaba’l día 26 de mayu, siempre hai más oportunidaes, pero ye evidente que ye un momentu clave nel que hai que dar el do de pechu, y por esos queremos informar bien a la sociedá asturiana, porque tienen que saber que si nun actuamos la llingua asturiana cuerre peligru. Dícenlo les instituciones internacionales: la UNESCO, la ONX, el Conseyu d’Europa…, y tenemos qu’actuar. La oficialidá nun ye inventu que sacaramos de la chistera, sinón que ye’l marcu constitucional, lo que diz la Constitución española y lo que se ta cumpliendo n’otres comunidaes. Simplemente tenemos qu’aplicar equí, con un modelu propiu, lo que diz la Constitución española”.

Contador Estadistiques