Un muséu qu'apuesta pol asturianu

Inaugurose ayeri en Mieres l'aula d'interpretación del Poblaú de Bustiello, conxuntu de viviendes obreres entamaes pola obra paternalista de Claudio López Brú, Marqués de Comillas y amu de la Sociedá Hullera Española, empresa que dominaba la cuenca minera del Aller a primeros del sieglu XX.

El pobláu, onde namás teníen derechu a vivir les families más cumplidores coles estrenches normes de comportamientu que-yos marcaba la empresa a los obreros, rescamplaba coles malísimes condiciones de vivienda del restu de los trabayadores, y yera l'exemplu más claru n'Asturies del paternalismu empresarial, una política consistente en tratar a los trabayadores como una masa de fíos pa colos que la empresa tenía de tener delles atenciones que diben muncho más allá de lo qu'entendemos güei por rellación llaboral ente empresa y obreru. A cambiu de ser puntuales, trabayar en condiciones durísimes ensin quexase, cumplir cola ilesia y respetar toles normes de somisión que mandaba la compañía, un númberu escoyíu d'obreros tenía la posibilidá de metese a vivir nes cases del pobláu, una colonia empozada xunta'l Ríu Ayer y dominada poles cases de los inxenieros, la estatua del patrón y la ilesia, estayes superiores nel orde de la empresa.

Un detalle guapu d'esti centru d'interpretación, nel que s'espliquen la vida del pobláu, la esplotación de les mines y el desarrollu de l'aventura empresarial de la dinastía del Marqués de Comillas, ye que se manda del asturianu como llingua vehicular nos tableros didácticos, nos que tamién se da'l testu en castellanu, y na retulación, cosa que nun dexa de ser noticia en cuantes que tamos poco avezaos a ver nes instalaciones culturales del país esti tratamientu.