Viejo fala d'onomástica personal asturiana na charra mensual d'Ástura

El doctor en Filoloxía Románica y investigador del Seminariu de Filoloxía Asturiana va centrase sobre manera nel momentu formativu de la romance, na época tardorromana y Edá Media. 

'Dándo-y nome a la identidá. La onomástica personal n’Asturies nos últimos dos mil años' ye'l títulu de conferencia mensual d'Ástura sobre cultura asturianu qu'acueye l'Atenéu Obreru de Xixón. Xulio Viejo va encargase de ponela esta tarde a les 19 hores, con entrada llibre hasta completar aforu.

La intervención propón un averamientu a los nomes de persona documentaos históricamente n’Asturies, dende les poblaciones indíxenes prerromanes hasta l’actualidá, poniendo especialmente’l focu nel momentu formativu de la onomástica romance asturiana, esto ye, ente la época tardorromana y, fundamentalmente, la Edá Media. "Al pie de lo que ye propiamente’l repertoriu de formes onomástiques, el so significáu etimolóxicu o’l so sentíu social, veráse cómo va evolucionando a lo llargo de los sieglos el sistema denominativu al son de los propios cambios sociales o les distintes tipoloxíes (nomes personales, patronímicos, nomes d’oficiu o procedencia, nomatos…), atendiendo a les sos implicaciones culturales y la so forma de constatación en rexistros documentales, na toponimia local, nel propiu usu conversacional…, dándo-y forma a un patrimoniu llingüísticu singular definitoriu de lo que ye la nuesa identidá comunitaria", adelanten dende Ásturia.