Un llibru xorrasca na historia de la emigración asturiana a Madrid

La conceyala d'Educación, Carmen Rúa, presentó ayeri xunto col director del Muséu del Pueblu d'Asturies, Joaquín López, el llibru "Asturianos en Madrid. Los oficios de les clases Populares nos sieglos XVI -XX", una obra que xorrasca nes condiciones materiales de vida d'estos emigrantes asturianos a la capital d'España y qu'analiza los trabayos que facíen superando'l vaciu documental existente sobre esta emigración.

El llibru ye'l frutu del alcuerdu del muséu asturianu col Institutu d'Estudios Madrileñu, que se roblo pensando en superar el vaciu existente en bibliografía sobre esta tradicional emigración asturiana a Madrid, debida quiciás a la escesiva atención que se-y dio a la emigración a América. La obra ye'l resultáu del llabor de Juan Jiménez Mancha, que trabayó na Hemeroteca de Madrid p'alcontrar toles reseñes sobre la presencia d'asturianos nesta ciudá, y estrémase en cuatro capítulos, en primer llugar, la descripción xeneral de la emigración asturiana a Madrid, esplicando dende les condiciones del viaxe hasta la creación d'un movimientu asociativu d'asturianos en Madrid. El segundu dedícase al oficiu de los aguadores, que llegaron a monopolizar dafechu los emigrantes asturianos. El L'oficiu de serenos, tomáu tamién por asturianos dende últimos del sieglu XVIII xunto conn emigrantes gallegos. El cuartu capítulu fala d'otros oficios nos que rescamplaron los asturianos, casu de mozos de carga, criaos, conductores de xarrés y coches, carboneros, ames de cría o tamién comerciantes.

Lo más novedoso del estudiu son les sos fontes, inédites hasta agora, y que son mayormente revistes y periódicos, obres lliteraries, reglamentos y documentación parroquial y del Archivu de la Villa de Madrid. La parte d'ilustraciones cúbrese con estampes y grabaos d'epoca.