Un llaboratoriu de rap n'asturianu va sirvir d'adelantu del festival urbanu de Samartín

Dani Stylo y Tori, de K-Nalón, van tomar parte nesta iniciativa abierta a tola xente interesao.

Esti Rap n'Ast Lab va ser más práuticu que n'ocasiones anteriores y va contar con estudiu de grabación propiu, polo que da la posibilidá a los asistentes de preparar un tema de manera conxunta. La cita ye a partir de les 18 hores de mañana na Casa de la Mocedá de Sotrondio, tres la presentación del programa del II Festival de Cultura Urbano de Samartín, que va celebrase'l 2 de xunu nel parque d'El Florán.

Que Nun Apare! entama esti eventu qu’axunta música, deporte, cultura y educación. Ente les actividaes avanzaes pola asociación xuvenil destaca un espectáculu de maxa; talleres de talla de madera y de madreñes, de break dance o de baille tradicional; un tornéu de baloncestu 3 contra 3; y conciertos d'Allanai Sound System y LaTxusMa, ente otros.

El Festival de Cultura Urbano de Samartín nació l'añu pasáu en respuesta a la non celebración de les tradicionales fiestes de La Llaguna. Dada la bona esperiencia, esti certame autoxestionáu y ensin ánimu d'arriquecimientu repite col oxetivu de tornar a dar protagonismu a la mocedá del conceyu al traviés d'un programa cultural y d'ociu diversu

Per otru llau, de manera paralela al llaboratoriu de rap n'asturianu, va entamase mañana un tornéu de tenis de mesa de baldre pa moces y mozos. Los ganadores van llevar premiu.