Quince actividaes conformen el II Festival de Cultura Urbano de Samartín n'El Florán

La llingua asturiana ye protagonista nesti eventu autoxestionáu pa la mocedá.

El parque d'El Florán sustitúi al Colexu Públicu El Coto, de L'Entregu, como sede del Festival de Cultura Urbano de Samartín que se celebra mañana. L'asociación xuvenil Que Nun Apare! entama un añu más esta iniciativa tres l'ésitu de participación algamáu l'añu pasáu.

Un total de quince actividaes bien variaes rellacionaes col deporte, la cultura hip hop y reggae, les tradiciones asturianes, la música, les artes escéniques, l’asociacionismu y la educación tán previstes dende les 11 hores a les 4 de la madrugada. "Una programación cultural y d'ociu diversa, poniendo en valor la interculturalidá, el papel de la muyer y la llingua asturiana, y na que la mocedá seya la protagonista, fueron les claves d'esti eventu autoxestionáu y ensin ánimu d'arriquecimientu que se vuelve a celebrar gracies al sofitu popular, al comerciu y la hostelería de Samartín, y a toles asociaciones, persones y artistes que desendolquen les actividaes", espliquen dende la organización.

El II Tornéu de Baloncestu na Cai va abrir el festival a les 11 hores nel Colexu Públicu Rei Aurelio, de Sotrondio. Mentes, na mañana hasta les 14 hores, va instalase n'El Florán un mercadín d'asociaciones y va ponese clase de yoga, xuegos tradicionales asturianos, graffitti, slackline –deporte d'equilibriu sobre una cuerda qu’une dos árboles– y una actuación de maxa hasta les 14 hores.

Les cais de Sotrondio y Blimea tamién van tener animación dende'l meudía con Los Gascones, que van actuar nel parque en sesión vermú de 14 a 15 hores. Los talleres van entamar dende les 16.30 hores y van ser de güertu urbanu, de baille asturianu, de facer madreñes y de break dance.

Conceyu de Sound Systems

El Grupu Folclóricu de Blimea va dar un espectáculu de baille y música hasta les 21.30 hores, momentu nel que van tener llugar los conciertos. Nellos les muyeres van ser les protagonistes gracies a la presencia del dúu rumba-punk LaTxusma y de les raperes Guaja D & Eli Swing.

Raspiando la medianueche, un espectáculu de malabares con fueu va dar pasu al I Conceyu de Sound Systems n’Asturies, que zarra l'eventu faciendo otra vuelta historia na cultura reggae asturiana. Si na edición pasada estrenábase la primera sound system –sistema de soníu de madera, ambulante y con orixe xamaicanu– del país, nesta ocasión va facese un alcuentru ente sound systems con participación d’Allanái y los gallegos Skank-Fu Hi-Fi hasta les 4 de la madrugada.