Muerre un bomberu nel incendiu del edificiu de la cai Uría d'Uviéu

Eloy Palacio, de 54 años, quedó atrapáu xunto con un compañeru tres desfarrapase parte del inmueble.

Una gran columna de fumu asustó esta mañana a los vecinos d'Uviéu. Un incendiu comenzaba poco depués del meudía na segunda planta del númberu 58 de la céntrica cai Uría y rápidamente s'estendía hacia les superiores del edificiu.

Los bomberos de la ciudá, totalmente desbordaos énte la falta d'efeutivos, y Policía Llocal, comenzaron los trabayos d'estinción, a lo que se sumaron dotaciones de bomberos de toda Asturies. Sicasí, la fuerza del fueu dificultaron los trabayos y ésti s'estendió per tola parte superior del edificiu, provocando'l desfarrape del teyáu.

L'incendiu llamó l'atención de munchos ciudadanos, que s'averaron al llugar. Les autoridaes rápidamente cortaron la cai y Melquíades Álvarez, y desallugaron trés edificios, yá que les llames tamién afeutaron al númberu 56. La causa podría ser un cortocircuitu nun de los focos halóxenos de la planta.

La desgracia llegó poco enantes de les 16.30 hores, cuando dos bomberos quedaron atrapaos tres la cayida de parte del inmueble. La rápida aición de los sos compañeros permitió rescatara a ún de los dos con vida, non asina al otru trabayador, Eloy Palacio, de 54 años y perteneciente al cuerpu de bomberos d'Uviéu.