Un fola de fríu polar aporta al país el martes

Asturies va vivir temperatures d’hasta 15 graos baxo cero nes xornaes próximes. Pa esti martes ta previsto qu’una fola de fríu polar aporte al país, con incidencia especial el miércoles y el xueves. La estación d’esquí de Fuentes de Invierno abrió les sos puertes esti llunes con 3,5 quilómetros de pista disponibles.

L’Axencia Estatal de Meteoroloxía (Aemet) dio la previsión de la llegada d’esti fríu polar pa mañana y tien actividaes alertes marielles por ‘temperatures mínimes’ na Cordillera y Picos d’Europa pa mañana y el miércoles de 20 a 7 hores. La fola siguirá tamién el xueves, siendo xunto al miércoles les xornaes onde s’espera que los termómetros presenten cantidaes más baxes, que podríen llegar hasta los quince graos baxo cero en zones altes.

El fríu, sicasí, nun traerá agua. Nun ta previsto qu’haya les precipitaciones de los díes últimos, qu’al ser en forma de nieve nel monte provocó l’usu obligatoriu de cadenes en dellos puertos y carreteres del país, pero nel casu de producise de manera aislada tamién podría ser como nieve na mariña.

Apertura de la temporada d’esquí

Mes y mediu depués de la fecha prevista pa l’apertura de la la temporada d’esquí n’Asturies, Fuentes de Invierno pue abrir les sos pistes. Nun va ser de forma completa, yá que güei permitió l’accesu a esquiadores a namái cinco d’elles: trés verdes, una azul y una collorada, con espesores de nieve ente 10 y 25 centímetros con calidá polvu.

En total, son trés quilómetros y medios los que tán disponibles pa los aficionaos, qu’entovía nun van poder utilizar Valgrande-Payares. La otra estación d’esquí asturiana sigue pesllada.