Un documental sobre la trayeutoria del grupu será'l proyeutu próximu de Llan de Cubel

La banda tien en mente entamar esti proyeutu tres lo asocedío esti sábadu en TPA.

Los miembros de Llan de Cubel decidieron güei mesmo estudiar l'encargu a una productora profesional d'un documental sobre la trayeutoria del grupu "que sía un trabayu curiosu y fechu con tiempu", confirmó Fonsu Mielgo. Les conversaciones internes qu'empecipiaron depués de la emisión del programa 'La nueche de Felpeyu y Llan de Cubel' na nueche del sábadu en TPA, con un tratamientu mui probe y dellos errores sobre la banda, llevaron a los músicos a valorar esta posibilidá.

Esta cinta ofreceríase a RTPA pa la so emisión. L'ente públicu de comuniciación pidió ayeri disculpes a Llan de Cubel, retiró l'espaciu de 'A la carta' como solicitaba la banda, y treslladó hasta en dos ocasiones el so compromisu pa iguar l'error reconocíu.

Na semeya, Llan de Cubel nuna actuación en Comillas nel 2017.