RTPA retira de ‘A la carta’ el programa ‘La nueche de...’ del sábadu tres la quexa de Llan de Cubel

Primero foron los telespectadores nel mesmu momentu de la emisión y, al día siguiente, el propiu grupu’l qu’asoleyaba una carta dirixida al direutor xeneral de RTPA na que tresmitía “la nuestra sorpresa ya indignación” pol espaciu ‘La nueche de...’, dedicáu tamién a Felpeyu. Llan de Cubel pidía al ente públicu la retirada de ‘A la carta’ del programa, lo que cumplió darréu.

“Esti programa tuvo una absoluta falta de rigor y calidá. Etiquétense falsamente como de Llan de Cubel imáxenes que nun correspuenden al grupu y utilícense conteníos pa los que nun se concedió nenguna autorización”, apunta la banda nel testu. “Nel convencimientu de qu'un ente públicu como RTPA tien la obligación moral d'emitir conteníos de calidá y ante too que cuenten con toles autorizaciones pertinentes, encamentamos a los responsables d’esti mediu a retirar esi espaciu de ‘TPA a la carta’ y a nun volver emitir dichu programa nin nengún otru conteníu rellacionáu con Llan de Cubel que nun cuente cola nuestra supervisión previa y l’autorización espresa per escritu, pa evitar que puedan producise mayores daños a la nuesa imaxe”, completaba dicha carta a Francisco González Orejas.

Llan de Cubel recibía a lo poco una llamada dende la RTPA pidiendo disculpes, reconociendo’l probe nivel de lo emitío y comprometiéndose a subsanalo. Tamién se retiraba, como se pidía, el programa emitíu’l sábadu, encargáu pol ente a una productora.

Ésti lleva’l nome de ‘La nueche de...’, dedicada a artistes de la escena musical asturiana, con cachos de les sos intervenciones n’espacios mayoritariamente de la mesma cadena. Asina, no que va d’añu la nueche de los cuatro sábados de xineru centráronse en Rodrigo Cuevas, Pipo Prendes, Chus Pedro y Vicente Díaz.

L’últimu capítulu facía lo propio con Llan de Cubel y Felpeyu, nun programa conxuntu que yá daba a pensar de la non esistencia de material suficiente pa un espaciu individual dedicáu a estes dos bandes señeres del folk asturianu nos 15 años d’emisiones de TPA. Asina se desmostró finalmente, lo que, sumáu al probe tratamientu a dambes bandes y los errores, provocó tanto la indignación del públicu como de los músicos.

Hasta la Xunta pola Defensa de la Llingua Asturiana asoleyó una nota na qu’apuntó que los visto’l sábadu “exemplificó'l tratamientu a la nuestra llingua y cultura nestos 15 años d'emisión de RTPA: desinterés, desinformación y 'tira que llibres’”. Criticó na mesma la figura del direutor xeneral y la direutora d’Antena, Lucía Herrera, que “tienen que dar esplicaciones nel Parllamentu sobre'l tratamientu de la música asturiana”.

“Una llaceria”

Fonsu Mielgo, miembru y ún de los fundadores de Llan de Cubel, valoró a Asturies.com “les disculpes fonderes que nos tresmitieron hasta en dos ocasiones” dende RTPA y “el compromisu d'igual l’error de dalguna manera”. Sicasí, definió’l programa como “una llaceria” y apuntó que nun-yos pidieron permisu, anque sí “nos avisaron que lo diben facer. Sabíamos que TPA tenía de nosotros poco o nada, pero camentábemos qu’emiteríen coses que nun conocíemos nosotros”.

Na imaxe, una captura de la promoción del programa por parte de TPA.