Un dibuxu del castiellu de Güetes, portada del númberu 4 de 'Friúz'

El so autor ye Xuan Pedrayes, que dedica un testu nel interior a esta edificación na que destacaben los sos dos torruxones.

L'asociación El Ronchel torna a completar un interesante númberu de 'Friúz', revista trimestral en llingua asturiana qu'afonda na cultura de los conceyos de Villaviciosa, Cabranes y Colunga. Tres dedicar el númberu 3 al Día de los Muertos, el 4 rexistra una temática más variada qu'abre un dibuxu na portada del castiellu de Güetes, na que tamién se pue ver la ponte medieval construyida posteriormente, col que'l llector pue facese una idea de cómo yera esti puntu onde nel 1270 se fundó la Pola de Maliayo. Na páxina 2, Pedrayes incorpora un testu sobre la historia d'esta edificación y el llugar onde s'asitió.

Un artículu d'Inaciu Galán sobre l'escritor Antón Forascepi, un cuentu de Mel Riva, la continuidá del reportaxe sobre los apellíos maliayos o una información sobre una conferencia de Juaco López son dalgunos de los conteníos, baxo la coordinación de Lluis Portal, qu'inclúi esti númberu de 'Friúz'.