‘Un derechu, diez lletres’: la demanda d’oficialidá torna a la cai cola manifestación pol Día de les Lletres

La Xunta pola Defensa de la Llingua Asturiana (XDLA) va dar un protagonismu especial a diez lletres, les que conformen la pallabra ‘oficialidá’, na manifestación d’esti sábadu con motivu del Día de les Lletres Asturianes. Va salir al meudía n’Uviéu y va finar coles actuaciones d'Ún de Grao, Alicia Álvarez y David Varela, y Misiva.

El coleutivu, que lleva 40 años entamando esta convocatoria, agora treslladada al día siguiente de la xornada de celebración de la nuesa lliteratura, quier asina “reivindicar que los derechos llingüísticos de los asturianos y les asturianes nun merecen más aplazamientos” y que “van siguir saliendo a la cai pa reclamalos”. La marcha va arrancar na Estación del Norte (RENFE) pa cruciar tola cai Uría y finar na plaza la Escandalera.

L’actriz Natalia Suárez Ríos va encargase de lleer el manifiestu nel escenariu instaláu nel llugar. Darréu Ún de Grao, el dúu conformáu por Alicia Álvarez y David Varela pa tocar interpreta temes pa la reciella de la cantante, y Misiva van ufrir actuaciones breves nel llugar.