La XDLA esixe la busca d’una mayoría “dende’l primer periodu de sesiones” p’acabar cola discriminación llingüística

“Hai qu’acabar yá cola discriminación llingüística, con esta situación d’anomalía democrática y constitucional que carecemos n’Asturies”, reclamó la Xunta pola Defensa de la Llingua Asturiana (XDLA) na manifestación d’esti sábadu pol Día de les Lletres Asturianes, marcada pola agua que cayó a primer hora de la mañana. Esixe a los partíos que busquen una mayoría “dende l’otru día de constituise la Cámara”.

Nun apaeció la lluvia cuando arrancó la marcha al meudía de la Estación del Norte (RENFE) d’Uviéu, pero nes hores previes nun aparó, lo qu’obligó a tomar la decisión a les 11 hores de suspender les actuaciones musicales previstes por riesgu llétricu. Diben xubir a tocar Ún de Grao, Alicia Álvarez y David Varela, y Misiva.

El mal tiempu pudo quitar asistencia, pero, sicasí, delles miles de persones –10.000 según la organización– bien preparaes contra l’agua acudieron a la convocatoria pa glayar “¡oficialidá!”. La gran banderona d’Asturies portada por Xosé María García Sánchez 'Llábana' abría la marcha y, detrás, les pandereteres.

A unos metros, el ‘baberu’ de la XDLA con ‘Oficialida’ y detrás diez lletres que conformaben esa mesma pallabres. Darréu’l restu de manifestantes, munchos con banderes d’Asturies y dalguna d’otros territorios como Lleón o Canarias, abriendo esti sector les neñes y neños de ‘Reciella. Families pol Asturianu’, que llevaben filu musical incluyíu.

Dexáronse ver con pancartes nesta convocatoria’l Sindicatu Unitariu Autónomu de Trabayadores de la Enseñanza d’Asturies (SUATEA), Comisiones Obreres (CC OO), Convocatoria por Asturies (IX-Más País-IAS), Andecha Astur, Mazcaritos d’Uviéu, Lliberales pola Oficialidá, Iniciativa pol Asturianu, Podemos y Aína.

“Nun tenemos que nos desanimar”

A la llegada a la Escandalera, l’actriz Natalia Suárez Ríos lleó’l manifiestu de la XDLA, que llamó a nun baxar los brazos. “Ye verdá que paez que somos víctimes d’un cuentu de la bona pipa ensin salida, pero asegúrovos que paga la pena: nun lo debemos tar faciendo tan mal cuando’l movimientu de recuperación llingüística foi quien a que nestos años l’asuntu de la oficialidá del asturianu y del gallego-asturianu se convirtiera nun tema central nes campañes electorales últimes y nos programes de dalgunos partíos”, rescampló.

Avisó d’una campaña eleutoral difícil, na que “vamos ver a los partíos más radicales y antidemocráticos que suañen con tener mayoría abonda pa desaniciar la llingua, o polo menos ganar tiempu pa dexala morrer adulces cola muerte de los últimos falantes” y “los que siguen aneciando col so eslógan falseru d’asturianu sí, oficialidá non, como si nun-yos lu desmontáremos milenta veces yá amosando l’autoodiu que s’escuende detrás, el complexu que tienen énte otres llingües del Estáu, a les que sí consideren dignes de tener reconocimientu oficial, y la discriminación que quieren siguir calteniendo pa les comunidaes de falantes d’asturianu y de gallego-asturianu”.

Tamién “los que se pronuncien ambiguamente a favor del asturianu, o qu’escuenden la palabra oficialidá con eufemismos, esperando nun tener un papel protagonista nel procesu que necesariamente se va abrir, o que lo dicen cola boca pequeña pa nun tener que se pronunciar los primeros o esperando’l momentu de poder usar los votos que vaigan tener pa intentar un cambéu de cromos con dalguna otra reivindicación que sí defenden o abanderen a les clares”. Pero, por contra, van tar “los que dicen tener un compromisu col respetu a les llingües y lleven nos sos programes propuestes de reforma del estatutu d’autonomía pa recoyer con diferentes fórmules y, ente otres coses, la oficialidá del asturianu y del gallego-asturianu”.

“Y esto”, afirmó, “tenemos que velo, tien que velo’l movimientu de reivindicación llingüística, como un trunfu de tantos años de movilización, d’estudiu, de dignificación, de reivindicación y d’usu de les llingües…, na música, nes artes escéniques, nel mundu audiovisual, na lliteratura, nos centros de trabayu y d’estudiu; en definitiva, na vida social. Ye un trunfu de toes y toos vós, y de muncha xente que tuvo y yá nun ta. Tien que facenos sentir que tamos cerca de que se llogre la oficialidá de les nuestres llingües. “Nun tenemos que nos desanimar”, insistía previamente.

Depués de les eleiciones

La XDLA centróse al final del manifiestu nes eleiciones del 28-M, nes que “sía’l que sía’l resultáu” final “el mandáu va ser imperativu pa la Xunta Xeneral que se forme: hai qu’acabar yá cola discriminación llingüística, con esta situación d’anomalía democrática y constitucional que carecemos n’Asturies”. Pa ello, “la única solución ye aprobar una redacción nueva del estatutu d’autonomía, siguiendo’l modelu de les seis comunidaes autónomes que yá reconocen la oficialidá de les llingües que se falen nos sos territorios. Ensin más aplazamientos, ensin condiciones y ensin recortes”.

Al respeuto, demandó un alcuerdu pa reformar l’Estatutu d’Autonomía y recordó que “un val echar cuentes de votos ensin trabayar primero na construcción d’esi alcuerdu. Nun val escusase na sida d’un resultáu partidista pa nun ponese a trabayar dende’l primer periodu de sesiones de la llexislatura, dende l’otru día de constituise la cámara, na busca d’esa mayoría”.

“Nun trabayar nesi sen va dar el mesmu resultáu que dio na llexislatura qu’acaba: que 18 diputaos y diputaes en contra d’un avance nel reconocimientu de los derechos llingüísticos foron quien a imponer a los demás, a la mayoría, y a tola población asturiano, la so idea d’una Asturies menos llibre, menos plural, menos tolerante y más atrasada. Que nun se repita esi fracasu”, alvirtió la XDLA.

Por último, Suárez Ríos señaló que “ye’l momentu de pasar a la historia construyendo una Asturies meyor, una Asturies arguyosa de lo de so, una Asturies onde toles asturianes y tolos asturianos tengan los mesmos derechos falen la llingua que falen”.