Ún de Grao, La Tarrancha y Skontra protagonicen l'axenda musical

|

José Martínez Álvarez abre nel Trisquel un periodu de gran actividá musical, mentes que les dos bandes que coincidieron nel 'Rock'n'Llingua' axúntense en La Felguera.

Seis son les feches que tien zarraes Ún de Grao pa lo que queda de marzu y abril. El músicu moscón va ufrir la primer d'elles esta nueche, a partir de les 20.30 hores, nel xixonés Café Trisquel, conciertu con entrada llibre nel que los presentes van poder sentir los cantares del so primer LP, 'Pelo segao', xunto a otres pieces.

Tres esta actuación, l'artista qu'apuesta pola renovación de la tonada va tornar a Xixón pa tocar nel Audio (xueves 4 d'abril, 20.30 hores), El Golfo (xueves 25, 19.30 hores) y Drink Planet (domingu 28, 13 hores). Tamién va llevar la so propuesta a Ḷḷuarca, en concreto al Cromwell (domingu 31 de marzu, 13 hores), y a Uviéu, al Manglar (sábadu 27 d'abril, 13 hores).

Na Sala Telva

El sábadu van compartir escenariu dos de les bandes veteranes de la escena asturiana: La Tarrancha y Skontra. Los primeros van presentar na cuenca'l Nalón el so quintu trabayu en solitariu, 'Baillando con llokes', tres facelo n'avientu en Xixón como celebración del so decimoquintu aniversariu.

Pa ello acompáñense de Skontra, banda de punk-folk con 18 años d'esperiencia sobre los escenarios. Dambes bandes yá coincidieran nel recopilatoriu 'Rock'n'Llingua', asoleyáu por L'Aguañaz nel 2004, con aquelles formaciones qu'emplegaben la llingua asturiana que comenzaben a destacar naquellos tiempos.

"Estos vieyos amigos van compartir escenariu, y músicos en dalgún de les temes, pero sobre manera van compartir calor, sudu y ritmu col públicu asistente al Telva, onde s'espera que sía un pogo de principiu a fin y la xente nun pare de baillar como llokes", anuncia La Tarrancha. La cita va ser el sábadu a les 20.30 hores, con entrada a 7 euros.

Otra manera, Skontra va ufrir un conciertu en Xixón el vienres 29 xunto colos italianos Talco dientro del festival nuevu 'RockOla'. El so preciu ye de 16 euros más gastos, anticipada, y de 20, na puerta.

Dende Galicia, Dakidarría

Una banda avezada tamién a mover al so públicu, amiestando ska, reggae y punk-rock, y emplegando la so llingua materna ye Dakidarría. Los gallegos visiten mañana Uviéu dientro de la xira 'Filosofía incendiaria', con High Paw como artista convidada.

El conciertu va dar comienzu a les 21 hores na Sala Sir Lauren's y el preciu de les entraes ye de 10 euros, anticipada, y de 13 na puerta. Éstes tán a la venta en La Bomba Records (Uviéu) y Paradiso (Xixón).

Contador Estadistiques