Yá ta na cai Rock'n'Llingua

Ta acabante de salir al mercáu'l compilatoriu de rock
n'asturianu editáu por "L'Aguañaz" Rock'n'Llingua.



Nesti discu "L'Aguañaz" presenta al
públicu asturianu a seyes grupos que tan llamaos a formar una nueva escena de
rock n'Asturies y n'asturianu. Ello ye que va muncho que se pide qu'apaezan grupos
qu'acompañen a "Dixebra" como representantes del rock
n'asturianu, y esti discu presenta los argumentos sonoros de caún de los
grupos pa ganar el preste del públicu.



A los primeros qu'alcontramos nel cd son a "Skontra", grupu
xixonés que ñació en marzu de 2001 col envís claru de
facer un punk revindicativo con lletres n'asturianu principalmente y delles
en castellanu. La gaita acompaña'l punk de
"Skontra", fecho de ritmu
imparable cola batería, la guitarra y la voz. El segundu grupu de la
llista ye "OI! N'AST", que
yá tienen un discu nel mercáu y munchos conciertos nel estoyu,
colo que podemos consideralos los más esperimentaos y conocíos
del discu. Nun cambien d'estilu pa esti compilatoriu, col sellu inconfundible
de la potente voz d'Hugo y la collaboración de la gaita de Blas Rodrigo
nun de los dos temes.



Los terceros son "La Tarrancha", que podríen formar
amás d'un grupu musical un equipu de fúbol yá que son 11
componentes. Toos ellos apuesten mayormente pol reagge y el ska pa facer el
soníu de la Tarrancha, pa lo que gasten una
sección de vientos, dos voces, batería, percusiones, guitarres y
baxu. Otros participantes nesti cd son "Güerku", que lleven unos
añinos sonando per conciertos n'Asturies, sobremanera nel conceyu de
Carreño. El so estilu ye'l que más s'asemeya a "Dixebra",
con un inconfundible toque folk cola gaita y la xiblata de travesu.



"Falcatrua" ye la quinta banda de "Rock'n'Llingua".
Tamién son de Xixón, que ye la ciudá d'onde paez que
más grupos salen faciendo rock n'asturianu. La gaita garra munchu
protagonismu nesti grupu, que polo demás tien una formación
clásica de batería, baxu, guitarra y voz. Piesllen el discu
"Milicia
Astur", ayeranos qu'echaron andar nel 2002. Tamién tienen a la
gaita como ún de los instrumentos principales, arropada pol restu de la
banda y lletres n'asturianu de temática social.



"Rock'n'Llingua" sal al mercáu de la mano de
"L'Aguañaz", con dos temes por grupu (12 en total) y con
muncha gana de meter ruíu n'Asturies. Si quies mercalu yá pues facelo na nuestra tienda Asturshop.com.