Un axuste nuevu en Liberbank afeutará a 171 trabayadores n'Asturies

El bancu conformáu poles desapaecíes CaxAstur, Caja Cantabria y Caja de Extremadura anunció un axuste nuevu d'emplegaos al traviés de baxes voluntaries cifráu en 979 trabayadores, 171 nel país. CSI refuga esta decisión, que califica de "chantaxe".

La propuesta presentada ayeri a los sindicatos en Madrid ye ufrir baxes incentivaes en condiciones similares a les ofrecíes nel primer axuste, qu'afeuta esti añu a 500 trabayadores nacíos ente 1956 y 1958, esto ye, renta mensual equivalente al 60 por cientu del so salariu brutu fixu actual hasta los 63 años, con un mínimu del 75 por cientu y un máximu del 80 por cientu del salariu netu a percibir en casu de siguir na empresa. Según esplica la Corriente Sindical d'Izquierda (CSI), hai 390 persones nesta situación, 125 n'Asturies.

Pal restu de trabayadores que nun sían del 1959 y 1960 hasta completar l'oxetivu de la direición, Liberbank plantega "30 díes per añu, hasta 20 mensualidaes, con una llende máxima de 120.000 euros", una ufierta ésta que, "teniendo en cuenta les repercusiones fiscales y la situación actual del mercáu de trabayu, ye difícilmente aceptable pa los 590 trabayadores que seríen necesarios pa completar el Plan d'axuste presentáu", sentencien dende'l sindicatu asturianu. Al respeuto, puntualicen que, pese a que les baxes son voluntaries, el bancu "optaría por midíes traumátiques" hasta cumplir los sos oxetivos, esto ye, "despíos puros y duros".

La disminución que se pretende ye de 979 trabayadores, 647 de oficinas y 332 de Servicios Centrales, de los que 171 seríen d'Asturies, 184 de Cantabria, 216 de Castilla-La Mancha Este, 94 Castil-La Mancha Oeste, 198 d'Extremadura y 116 de zones d'espansión.

El desaniciu de lo que foi CaxAstur

"Como se ve, la direición pretende que los sindicatos de Liberbank apoyemos un Plan d'ajuste que constitúi un chantaxe intolerable y nos aboca de manera deliberada a conflictos nuevos al pretender que negociemos con una pistola na tiesta", apunten dende CSI. L'oxetivu del bancu ye "siguir per otros medios colos recortes del ERE en vigor, una vegada llegao'l final d'ésti", añaden.

"La CSI considera qu'una ufierta que nun contemple la voluntariedá para tolos trabayadores y qu'incluya l'amenaza de dispíos nun pue ser aceptada nin siquier como puntu de partida. Entovía más cuando los trabayadores de Liberbank tamos sometíos a un ERE de trés años y medio de llargor, con recortes salariales duros, que se pretendió xustificar nel so día col argumentu de que nun había despíos y, mientres esti ERE, pagáronse dividendos a los aicionistes y declaráronse beneficios abondantes", sentencien.

Por último, el sindicatu esplica que Liberbank "nun mos fixo entrega de nenguna documentación qu'acreditara la necesidá d'esti axuste, nin aportó datos sobre los pieslles y les tresformaciones que se tán desendolcando en Servicios Centrales y oficines". Al respeuto señala que "el plan pilotu de cambios n'oficines, desendolcáu n'Avilés, ta demostrando sobradamente que lo que busca la direición de Liberbank ye l'esguace y el desaniciu de lo que foi CaxAstur, en perxuiciu de los trabayadores, los clientes y la sociedá asturiana en xeneral".