Un 54 por cientu de los llectores d'Asturies.com cree acertáu'l nome escoyíu pa promocionar los productos asturianos

'Alimentos del Paraíso Natural', la marca paragües escoyida pa la promoción de los productos asturianos, ye un aciertu pal 54 por cientu de los nuesos usuarios. Un 46 por cientu opina que ye un error por nun facer referencia esplícita a Asturies.

Nel nuesu 'Conceyu Abiertu' llanzamos a los nuesos llectores la entruga '¿Paez-y acertada la escoyeta de la marca 'Alimentos del Paraíso Natural' pa promocionar los productos asturianos?', encuesta que rexistró un resultáu mui axustáu. Un 54 por cientu considera que ye un aciertu porque 'l'eslogan 'Paraíso Natural' ye bien conocíu y rellaciónase siempre con Asturies', siguiendo asina la llinia d'otros territorios, como Castilla y Lleón, qu'emplega la marca 'Tierra de Sabor'.

Por contra, un 46 por cientu de les persones que participaron considera un error l'usu de 'Alimentos del Paraíso Natural 'porque nun fai referencia nenguna a Asturies'. Estos llectores aboguen por facer una referencia esplícita a Asturies, como ye'l casu de Galicia con 'Galicia calidade'.

Dende esti momentu yá ye posible votar nun 'Conceyu Abiertu' nuevu. Nesta ocasión queremos conocer qué opinión tienen los nuesos llectores sobre la celebración de folixes a imitación de la 'Feria de abril' sevillana.