Traten de robar un bolañu pa bombarda de tiempos d'Alfonso Enríquez

|
Traten de robar un bolañu pa bombarda de tiempos d'Alfonso Enríquez

La seguranza del Muséu Arqueolóxicu frustró na mañana del domingu'l robu d'un bolañu pa bombarda del sieglu XIV cuando la instalación taba abierta al públicu. Trátase d'un proyeutil del piedra que sería de los emplegaos en tiempos d'Alfonso Enríquez poles tropes castellanes nel asediu a Xixón.

La Policía Llocal d’Uviéu detuvo a un home sobre les 10 hores depués d’intentar sustrayer la pieza, operación qu'atayaron los servicios de seguranza del equipamientu. El lladrón trató de llevar un bolañu pa bombarda, un proyectil petreu esféricu, del sieglu XIV espuestu na tercer planta del muséu, pero les cámares de videovixilancia permitieron ver la operación.

L'individuu, al comprobar que'l so movimientu nun pasó desapercibíu, dexó la pieza nel descansu de la escalera de serviciu, ente les plantes primera y segunda, siendo deteníu polos servicios de seguranza, cola ayuda del personal del propiu centru, a la salida del muséu, que lu retuvieron hasta la llegada de la Policía Llocal.

La pieza oxetu del robu quedó un poco estropiada, pero yá se treslladó a los talleres de restauración del muséu. Otilia Requejo, direutora xeneral de Patrimoniu de la Conseyería d’Educación y Cultura, calculó’l so valor en 2.000 euros y les estroces causaes pol socesu, nunos 500.

Contador Estadistiques