Trasiegu Fest, un certame pa poner en valor la cultura sidrera contemporánea repartíu en cuatro conceyos

Cabranes, Bimenes, Sariegu y Colunga van acoyer del 18 al 24 de setiembre’l Trasiegu Fest, un certame que naz “col envís d’amosar la bayura de la cultura sidrera n’Asturies”. Talleres, charres, lliteratura y gastronomía van conformar un programa na que la música va tener un gran pesu, cola participación de 8 grupos yá confirmaos que van del folk al rock, pasando pel baille tradicional o la electrónica.

Baxo la etiqueta “festival de la cultura sidrera contemporánea” va desenvolvese’l Trasiegu Fest, qu’entama la plataforma Ver Asturies en collaboración con Cuatro Gotes Producciones y los cuatro conceyos de la Mancomunidá de la ‘Comarca de la Sidra’ que van acoyer les actividaes, que se van anunciar nos díes próximos. Yá ta confirmada, sicasí, la programación musical, que va arrancar el vienres 22 en Santolaya con una ‘Nueche en Mayanza’ col Grupo Folklórico Trebeyu (21 hores, Plaza’l Conceyu).

Cabranes tamién va acoyer, yá’l sábadu, les actuaciones de Los Gascones pel día, y de tarde, dende les 20 hores, de Luis Núñez y los Folganzanes, Algaire, La Tarrancha y Llevólu’l Sumiciu. El domingu la música va treslladase a Bimenes, con conciertos pela mañana de Mestura y de David Varela en Santuyano, na Casa Cultura.

“El Trasiegu Fest ye un proyectu que naz col envís d’amosar la bayura de la cultura sidrera n’Asturies”, apunten los organizadores, que consideren que “ye importante facelo al traviés d’un formatu modernu y que llegue al públicu”, sacando la cultura sidrera de los sos sitios habituales y treslladándola “a llugares populares y onde’l gran públicu pueda averase”. El certame cuenta con sofitu del Plan de Recuperación, Tresformación y Resiliencia del Gobiernu estatal con fondos europeos.

Na semeya, la Casa Conceyu de Cabranes, frente a la que se van celebrar los conciertos de Santolaya.