El Trasiegu Fest zarra la so programación

Va desendolcase del 18 al 24 d'esti mes en Cabranes, Bimenes, Sariegu y Colunga.

El Trasiegu Fest, el festival de la cultura sidrera asturiana contemporánea, ta acabante de confirmar tola programación. Depués d'avanzar la parte musical del certame, agora presenta les diferentes alderiques, talleres, concursos o representaciones teatrales previstes nestos cuatro conceyos de la Mancomunidá 'Comarca de la Sidra'.

Cabranes va abir les actividaes el llunes 18 al meudía con un taller nes escueles entituláu 'Averamientu a la cultura sidrera', que va llegar el martes a Bimenes, el miércoles a Colunga y el xueves a Sariegu con Llucía Marqués como responsable d'esplicar a les alumnes y alumnos les diferentes fases del frutu y los procesos d’ellaboración de la sidra, asina como la creación d’una identidá alredor d’esta bébora. Da tarde, a les 18.30 hores na Casa Cultura de Santolaya, va ponese la mesa redonda 'Nuevos caminos na cultura sidrera', na que va esplorase les nueves formes nes que se trabaya alredor de la cultura sidrera dientro del turismu, la industria, la economía circular con trabayadores y trabayadores d’estos sectores.

El martes, siempre a la mesa hora, na Casa Cultura de Santuyano va falase del potencial que tien l’usu de la llingua asturiana nel mundu sidreru en 'L’asturianu, llingua sidrera', y el miércoles, na plaza d'abastos de Colunga, la importancia de la DOP Sidra d’Asturies nel futuru y nel presente de la cultura sidrera asturiana y el llabor que fai l’órganu regulador pol consumu y la promoción d'esta cultura en 'Presente y futuru de la DOP Sidra d’Asturies'. Completa'l programa de meses redondes 'La sidra y les artes', na Casa Cultura de Vega, que va afondar nes posibilidades y nel tratamientu que la sidra y la so cultura tien nes artes.

Estos primeros díes, hasta'l vienres, tamién va poder visitase una esposición sobre'l Concursu de Fotografía Sidrera Muebles Pandiella-Milar nel Casa Cultura de Santolaya n'horariu de 10 a 14 y de 16 a 19 hores.

Mercáu tradicional en Santolaya

El vienres va instalase en Santolaya un mercáu artesanu y gastronómicu que va tar activu de 16 a 23 hores y, el sábadu, de 11 "a pieslle". En Cabranes va tener llugar tola actividá d'estos dos díes, con un recital de poesía (18 hores); el concursu d'escritura sidrera improvisada '¡Un culín de lletres!' (19 hores); la entrega de premios del concursu de fotografía sidrera (20 hores); el pregón del Trasiegu Fest na Casa Conceyu a cargu de Luis Benito García Álvarez, direutor de la Cátedra de la Sidra (20.30 hores); y un taller de baille ‘Nueche en Mayanza’ col Grupo Folklórico Trebeyu (21 hores) na primer xornada.

Al día siguiente Ánxel Nava va facer una actividá artística al meudía alredor del mundu de la sidra nes cais de Santolaya, que van animar Los Gascones dende les 13 hores. El teatru de cai va llegar a les 16 hores con una representación sidrera a cargu de La Buelga mentes que la música va protagonizar tola tarde y nueche con Luis Núñez y los Folganzanes (18.30 hores), Algaire (20.30 hores), La Tarrancha (22.30 hores) y Llevólu’l Sumiciu (00.30 hores).

La xornada final, en Santuyano y Martimporra

Bimenes va centrar les actividaes del domingu, que van principiar al meudía en Santuyano con música pa neñes y neños con Mestura y, dende les 13 hores, con David Varela, que va dar un conciertu didácticu familiar. Yá en Martimporra, nel Palaciu del Marqués de Estrada, va poneses un taller de cocina nel que productu principal va ser la sidra, pero onde tamién van tar presentes otros productos de la tierra y la mar asturiana.

La mesa redonda 'Muyeres, motor del mundu sidreru', a les 18 hores, na que delles muyeres que trabayen nel mundu de la sidra van crear un alderique sobre les sos perspeutives y los pasos que se pueden dar pa meyorar la situación d’esti sector, y una tastia de sidra de gala, a les 19 hores, van poner el ramu al Trasiegu Fest, qu'entama la plataforma Ver Asturies en collaboración con Cuatro Gotes Producciones y los cuatro conceyos qu'acueyen el certame.