Transición enerxética, financiación y infraestructures, temes sobre la mesa en Moncloa

Javier Fernández aconceya esti miércoles con Pedro Sánchez, presidente d'España.

La nomada transición enerxética y les sos consecuencies pal conxuntu de la economía asturiana va centrar la reunión de presidentes. Fernández, según anunció, va reclamar que se xestione cola Comisión Europea la prórroga de l'actividá minera tres el 31 d'avientu y el caltenimientu de les centrales térmiques de carbón, una planificación a mediu y llargu plazu sobre les eventuales clausures y cambios na llei del sector llétricu que permitan que la decisión última sobre los posibles zarros sía del Gobiernu.

La financiación autonómica va ser otru de los asuntos prioritarios del alcuentru. L'asturianu va recordar la necesidá d'un impulsu a la reforma del sistema pa encauzala y, de ser posible, concluyila nesta llexislatura, con toles negociaciones nel marcu multillateral del Conseyu de Política Fiscal y Financiera.

Nesti casu, la posición d'Asturies ye bien conocida: estimación afayadiza del costu xunitariu de los servicios, nivelación total y mantenimientu del statu quo. En definitiva, "la defensa d'un modelu nel que la solidaridá siga siendo la premisa fundamental, y basáu nel cálculu y la cobertoria de las necesidaes de gastu y non nes capacidaes fiscales de cada territoriu", apunten dendel Gobiernu.

Payares y autopista del mar

No que se refier a les infraestructures, el pidimientu principal del Executivu asturianu ye'l caltenimientu de los compromisos yá esistentes en cuento a plazos y financiación nes actuaciones más urxente pal país, destacando la variante ferroviaria de Payares o'l plan de cercanías ferroviarias. Tamién va tratase la implicación del Estáu na ZALIA y la restitución de l'autopista del mar ente Xixón y la población bretona de Naunnt-Saint-Nazère.

Otres cuestiones previstes na axenda son el retu demográficu y la urxencia de retomar la ellaboración d'una estratexa estatal, tal y como se comprometiera na Conferencia de Presidentes última.