Sánchez va respetar los plazos de les infraestructures pero dexa nel aire'l carbón

Dixo tomar nota sobre'l pieslle de les centrales térmiques, ensin comprometese con Javier Fernández a garantizar el so futuru.

Los presidentes d'Asturies y España aconceyaron ayeri en Madrid dientro de les entrevistes que ta celebrando l'inquilín nuevu de Moncloa colos dirixentes de tolos territorios del Estáu. Javier Fernández desplazóse a Castilla con trés temes principales na so axenda, transición enerxética, financiación y infraestructures, y tornó pal país con bones perspeutives namái nos dos últimos.

Pedro Sánchez comprometióse colos plazos afitaos pol Executivu anterior nes trabayos d'importancia vital p'Asturies, como la finalización de los túneles del AVE nel 2020, l'apertura del tráficu mestu de viaxeros y mercancíes na variante de Payares, l'impulsu del Plan de Cercanías fechu y la restitución de l'Autopista del Mar ente Xixón y la población bretona de Naunnt-Saint-Nazère. Otra manera, tamién hebo alcuerdos p'afrontar la problemática demográfica o pa la participación del Gobiernu nos actos del triple centenariu de Cuadonga, ente otros asuntos.

Descarbonización

La parte negativa del alcuentru foi no que se refier a la transición enerxética, con bones pallabres pero ensin posicionamientos concretos. Namái concretóse la defensa del Gobiernu estatal énte Bruxeles d'una flexibilización de la devolución d'ayudes y una prórroga pa evitar el zarru de mines más allá del 31 d'avientu, y la llegalización de la regaificadora pa qu'ésta entre en marcha.

Sobre'l zarru de les térmiques, Sánchez apuntó a Fernández que ye un tema que se va abordar con voluntá de diálogu y negociación, pero nun se moyó col so futuru, vital pa la industria asturiana polos aumentos de los costos de la elletricidá que supondría, y pal tráficu n'El Musel, amás de pal emplegu nes zones mineres del país.

Semeya obra d'Armando Álvarez.