TPA y TVG axunten a artistes asturianos y gallegos esta Navidá pa la primer emisión conxunta de les dos televisiones

‘Inimitables: Benvidos / Bienllegaos’ ye’l títulu del programa conxuntu grabáu en Ribadeo pola TVG y TPA de cara a esti 25 d’avientu, Navidá. Marisa Valle Roso, Rodrigo Cuevas, Los Berrones y Anabel Santiago van poner la nota a asturiana a la primer emisión conxunta de les dos canales autonómiques públiques.

Sonia Fidalgo, Alberto Rodríguez y el gallegu Arturo Fernández van conducir un programa nel que se va combinar humor y música nes llingües de dambos países. El programa tamién va viaxar peles parroquies d’Abres (A Veiga) y Ría de Abres, separtaes pel Eo, amás de Taramundi y Picos.

La representación asturiana va ser de luxu, coles cantantes con orixe na tonada Marisa Valle Roso y Anabel Santiago, la gran estrella de la música asturiana anguaño Rodrigo Cuevas y una banda con miles de siguidores tanto n’Asturies como en Galicia, Los Berrones. Mentes, pel país vecín van participar la gaiteira Susana Seivane, la cantante Lucía Pérez, el grupo Os Melidaos y el músicu, artesanu y investigador Pablo Carpintero.

La emisión, primera conxunta de les dos canales públicos, va ser mañana, a les 22.20 hores, pa siguir depués con un programa resume del Festival Interceltique de Lorient d’esti añu. Mentes, pa esta nueche, a les 21.19 hores, va emitise un especial d’humor ‘Pero como ríen’ dende’l Teatru Prendes de Candás, dando paso llueu a la música con ‘Operación Verbena’, una actuación de la orquesta gallega Paris de Noia y la redifusión del especial ‘Music.as’ que percuerre 40 años de cantares y actuaciones d’artistes asturianos y de fuera nel país.

Na imaxe, Fernández y Fidalgo. Semeya de la Corporación Radio e Televisión de Galicia (CRTVG).