La gala de TPA y TVG algama una cuota de pantalla del 15,7 por cientu n'Asturies

La media d'espectadores que siguió'l programa pela asturiana foi de 45.000.

‘Inimitables: Benvidos / Bienllegaos’ convirtióse nel espaciu más vistu del día ayeri na TPA. La gala de Navidá nes llingües de dambos países grabada en Ribadeo con presencia d'artistes asturianos y gallegos algamó un 15,7 de cuota pantalla según los datos de Kantar Media daos a conocer pol ente públicu asturianu, qu'esti mes d'avientu tien una media del 6,8 por cientu, anque NewixMedia, marca de comercialización de publicidá de la Federación d'Organismos de Radio y Televisión Autonómicos (FORTA), aumenta la cifra al 16,3 por cientu y 55.000 espectadores.

Pela so parte, TVG nun difundió entovía datos d'audiencia de la emisión del programa en Galicia. Sicasí, sí anunció que la televisión pública llariega foi escoyida de manera mayoritaria polos gallegos na xornada d'ayeri con una cuota del 10,7 por cientu, la más alta de toles autonómiques.