Tornen los cursos d'asturianu en llinia de nivel básicu d'Iniciativa

La matrícula va tar abierta hasta'l día 28.

Cola fin del branu, Iniciativa pol Asturianu recupera los sos cursos d'asturianu. Nesta ocasión programa dos, de nivel básicu I y II, el primeru destináu a persones ensin formación nel idioma o con nivel baxu de conocencia y el segundu, a aquellos con un saber más fondu del idioma o que yá ficieren dalgún cursu enantes.

Entrambos van ser en llinia al traviés d'una plataforma dixital, un total de 36 hores llectives –el cartelu que los anuncia marca 30 de manera errónea– que van entamar el martes 3 d’ochobre y van finar metanes payares. Según apunta la organización, esti formatu "favorez la autoorganización del alumnáu y permite-yos dir faciendo les actividaes según l’horariu de caún, de manera más conveniente".

El preciu de la matrícula, que fina'l día 28, ye de 60 euros, de 50 pa les persones asociaes a Iniciativa pol Asturianu, descuentu al que se va poder acceder dende'l momentu de la inscripción pela páxina web del coleutivu. Les persones que completen el cursu van recibir una acreitación de l’Academia de la Llingua Asturiana.