Iniciativa pol Asturianu entama cursos de nivel básicu en llinia o presencial n'Uviéu

Tán los dos empobinaos a persones ensin formación d’asturianu o con nivel baxu de conocencia, cola posibilidá de facer el siguiente, el básicu 2, a distancia.

Cola llegada de la seronda, Iniciativa pol Asturianu entama los sos cursos d'asturianu, recuperando'l mou presencial. Va ser n'Uviéu, de nivel básicu 1, mentes que les persones qu'escueyan el métodu en llinia van poder acceder tamién al nivel siguiente, destináu a persones con una conocencia más fonda del idioma o que yá fixeren dalgún cursu enantes.

Los cursos van tener una duración de 36 hores llectives y van entamar el llunes 3 d’ochobre, con final metanes avientu. El so preciu ye de 60 euros, de 50 pa los socios y socies d'Iniciativa pol Asturianu, cola posibilidá d'asociase nel mesmu momentu de la matrícula, que s'ha tramitar n'Internet enantes del día 28 al traviés d'esti formulariu.

El Conseyu de la Mocedá del Principáu d'Asturies va acoyer les clases presenciales, n'horariu entovía por confirmar a la espera de consensualo ente tolos inscritos. Mentes l'alumáu de los cursos en llinia va poder organizar el tiempu al so gustu pa la realización de les actividaes esixíes al traviés de la plataforma dixital facilitada.

Les persones que los superen van algamar una acreitación de l’Academia de la Llingua Asturiana.

Na semeya, un momentu de la inauguración d'un cursu pasáu d'Iniciativa pol Asturianu nel Conseyu de la Mocedá del Principáu d'Asturies.