“Toi dispuestu a falar sobre la reforma del Estatutu d'Autonomía y a abrir l’alderique de la oficialidá en Foro”, asegura Pumares

El diputáu y secretariu xeneral de Foro, Adrián Pumares, confirmó esti vienres que ta “dispuestu a falar sobre la reforma del Estatutu d’Autonomía” y a abrir un alderique "seriu y sele" nel so partíu sobre la oficialidá. Sicasí nun recibió entá llamada nenguna de la FSA al respeuto, comunicación que dulda “que se vaya a producir”.

Pumares fixo estes declaraciones al programa de RPA ‘Asturias Hoy 2ª Edición’ nuna xornada na que tamién aconceyó con Inaciu Galán, responsable de Rellaciones Institucionales d’Iniciativa pol Asturianu, col que caltuvo la mesma postura. Asina, asegura nun tener problema nengún en falar sobre una reforma del Estatutu d’Autonomía na que la so posición va ser clave, al ser necesario un votu p’algamar los trés quintos de la Xunta Xeneral, esto ye 27, siendo hasta’l momentu los únicos favoratibles a encarar l’asuntu la Federación Socialista Asturiana (FSA-PSOE), Podemos y Asturies pela Izquierda (Izquierda Xunida-IAS), que sumen 26: 20, 4 y 2, de manera respeutiva.

“Toi dispuestu a falar de lo que sía, y cuando digo de lo que sía inclúi tamién la reforma del Estatutu d’Autonomía. Y yo, anticipándome amás a esa posible llamada que nun se produxo, y permítame duldar que se vaya a producir, sí voi a abrir esi alderique nel senu de Foro”, afirmó en RPA.

Nesi sen, magar que dende’l 2015 la organización asturiana valora la oficialidá nel so programa eleutoral, apuntó que “me compremeto a llevar esi alderique dende yá nel senu de Foro, que ye onde s’ha de tener. Desgraciadamente depués d’una década dende la formación del partíu nun hebo esi alderique d’una manera seria y sele, poniendo datos y postures enriba la mesa”, confirmó.

Optimismu na ALLA y n’Iniciativa pol Asturianu

Xosé Antón González Riaño, presidente de l’Academia de la Llingua Asturiana (ALLA), aconceyó ayeri col presidente Adrián Barbón, xunta na que la reforma del Estatutu d’Autonomía pa incluyir la oficialidá del asturianu y gallego-asturiano foi’l noyu central. “L’Academia de la Llingua Asturiana entiende que na Xunta Xeneral hai güei esi númberu de 27 diputaos y, que darréu d’ello, pue entamase esti procesu, yá que nesta llexislatura les fuerces parllamentaries favoratibles a la oficialidá son ampliamente mayoritaries”, rescamplara la institución tres la mesma, poniendo’l focu tamién en Foru, con dos diputaos nel Parllamentu, anque l’otru escañu ta en posesión de Pedro Leal, espulsáu del partíu.

Esti mesmu optimismu amosólu Iniciativa pol Asturianu depués del conceyu d’esta mañana con Pumares, celebráu nel Conseyu de la Mocedá de Xixón. “Danse les circunstancies p'abrir la negociación estatutaria y cuntar colos 27 votos pa la oficialidá”, apuntaba Galán tres l’axuntamientu.

Nesi sen, l’asociación llamó a “facer un esfuerciu políticu dende l’entendimientu pa salvar l’idioma. Creemos que tamos nun momentu nel que la unidá y l’entendimientu son mui importantes”.

Al igual que l’ALLA, marca 2021 como la fecha na que se debería entamar un procesu nel que “trabayar ensin partidismos, ensin protagonismos nin esclusiones” pa “sumar voluntaes pol idioma” y “aprovechar esta mayoría pa facer hestoria y llograr dar normalidá constitucional nel Estatutu a les llingües d’Asturies”.

Na semeya, Galán y Pumares nel aconceyamientu d'esta mañana en Xixón.