García Granda va poner una conferencia'l VIII Día de les Ciencies Asturianes

|
VIII Día de les Ciencies Asturianes

El científicu Amador Menéndez Velázquez va dar una charra divulgativa a escolinos.

La Conseyería d’Educación y Cultura celebra la octava edición del Día de les Ciencies Asturianes con dos actividaes en llingua asturiana centraes na investigación y la teunoloxía al serviciu de la humanidá. El rector de la Universidá d'Uviéu, Santiago García Granda, va impartir mañana la conferencia 'Notes sobre la investigación na Universidá d’Uviéu' nel salón d'actos del Muséu Arqueolóxicu d'Asturies, a les 19:30 hores, intervención que va centrase nel llabor de la institución académica, onde alredor de dos mil investigadores desenvuelven el 80 por cientu de la I+D+i del país.

El vienres el turnu va ser pa escolinos de Llaviana. Menéndez Velázquez, doctor en Química pola Universidá d'Uviéu y anguaño trabayador del Institutu Teunolóxicu de Materiales d'Asturies (ITMA), depués de pasar pel Conseyu Superior d'Investigaciones Científiques, el Llaboratoriu Européu de Radicación de Sincrotón, el Centru d'Investigación en Nanomateriales y Nanotecnoloxía (CINN) y el Massachusetts Institute of Technology (MIT), ente otros, va falar de la 'Tecnoloxía al serviciu de la humanidá' a les 12 hores na Casa Cultura de La Pola, conferencia na que va presentar les posibilidaes qu'ufierta la teunoloxía a la hora d'encarar dalgunos de los retos más importantes de la sociedá actual.

El VIII Día de les Ciencies Asturianes coincide cola celebración nesti mes del Día Mundial de la Ciencia pa la Paz y el Desarrollu. Esta cita ufierta la posibilidá d'amosar la importancia de la ciencia na vida diaria y favorecer l'alderique, siendo'l tema d'anguaño 'La ciencia, un derechu humanu' al conmemorase esti 2018 el setentenu aniversariu de la proclamación de la Declaración Universal de los Derechos Humanos.

Contador Estadistiques