“Tenemos munches ganes de renovar el repertoriu y esti conciertu va ser l’últimu nel que se van poder sentir dellos cantares”, avanza Elipe

Dixebra presenta esti vienres con una actuación n’Uviéu’l discu que recueye’l conciertu pol 30 aniversariu celebráu l’añu pasáu nesta mesma ciudá. Esta cita va ser “un puntu y aparte” pal grupu, que va renovar el repertoriu y va entrar n’estudiu darréu pa preparar los cantares nuevos del próximu trabayu, previstu pa la seronda.

“Tenemos munches ganes de renovar el repertoriu y esti conciertu va ser l’últimu nel que se van poder sentir dellos cantares en munchos años o pa siempre”, avanza Xune Elipe, cantante de la banda. La intención del grupu ye que nes actuaciones de primavera comiencen a entrar dalgunos de los temes nuevos pa rodalos, como ye vezu na so trayeutoria.

Pero primero Dixebra va poner el ramu a estos dos años especiales con motivu del trentenu aniversariu de la banda con un conciertu que sirva de presentación al discu que recueye l’audiu de l’actuación conmemorativa celebrada nes fiestes de San Mateo baxo la lluvia la nueche del 17 de setiembre del 2017. Un soníu “mui potente”, a lo qu’ayudó la participación de José Manuel Tejedor (gaita tradicional), Javier Tejedor (acordión), Rubén Bada (violín y bouzouki), Ángel Ruiz (banjo) y Toño Gómez (trombón).

El 30 de payares salió a la venta na rede, consiguiendo colocase na llista de los 100 discos más vendíos de tol Estáu, liderada naquel momentu pola ex concursante del televisivu ‘Operación Triunfo’, Aitana. “Sorprendiónos entrar na llista xunto con artistes y grupos tan conocíos. Ye dalgo importante non sólo pa Dixebra, sinón tamién pa la música asturiana. Somos un mercáu mui pequeñu, venimos de l’autoproducción, y el tar ehí da visibilidá a la música asturiana, yá que llega a emisores de radio especializaes y periodistes”, esplica Elipe.

Los asistentes al conciertu (22 hores, Tribeca) van poder facese col discu, que tien una tirada llendada a 500 copies, a un preciu especial de 5 euros, mui inferior al que tendrá nes tiendes. La entrada tien un costu de 10 euros anticipada y de 14, na puerta, con tickets yá a la venta en L’Esperteyu (Uviéu), El Cafetón (Avilés) y Café Trisquel (Xixón), o na rede na plataforma Entradium.