Dixebra va presentar el discu del conciertu del trentenu aniversariu con una actuación en direuto n’Uviéu

|
Discu 30 aniversariu Dixebra

El vienres 28 d’avientu va tener llugar na uvieína sala Tribeca la presentación del discu col audiu del conciertu del trentenu aniversariu de Dixebra celebráu la nueche del 17 de setiembre del 2017 nel marcu les fiestes de San Mateo. El grupu avilesín va ufrir una actuación pa la que ta preparando una sorpresa especial.

El mal tiempu, con muncha agua cayida esa madrugada, desllució la xornada, pero nun impidió un ambiente festivu y una actuación musical “mui completa, na que se nota que la banda venía rodada de la xira de los 30 años”, apunta’l cantante Xune Elipe. Grabáu con un equipu profesional, “atopamos que’l material que teníamos yera mui potente, reforzáu col trombón de Toño Gómez nos vientos; con Xavier y José Manuel Tejedor, y el vigulín de Rubén Bada dando un toque especial a los temes folkis;  y, nos más ska, cola sonoridá distinta qu’aporten el banjo d’Ángel Ruíz y el bouzouki de Bada”, lo que llevó a Dixebra a asoleyar un discu col audiu “tal cual foi’l conciertu, ensin modificación nenguna”.

El resultáu ye un CD con formatu especial del que sólo van asoleyase 500 copies. Ésti va incluyir los 19 cantares que sonaron aquella madrugada, amás d’un llibretu grande, con semeyes en blancu y prietu feches por Pablo Fernández y col testu ‘Rock de combate’, espublizáu por Elipe n’Asturies.com en xineru del 2017, al que-y fixo delles modificaciones. La so salida a la venta va ser el 30 payares, anque namái pela rede, en Musicasturiana, con una tirada especial pa les cincuenta primeres persones que lu acuten que va dir firmada de manera manual por tolos miembros de Dixebra, amás de la posibilidá de llevar, al traviés d’un sortéu, una botella de sidra conmemorativa del 30 aniversariu que sacó la banda con Fanjul.

Preciu especial na presentación

Para poder mercalu físicamenta va haber qu'esperar hasta’l día del conciertu de presentación, el 28 d’avientu, cuando va contar con un preciu especial pa los asistentes a una cita “pa la que tamos preparando una sorpresa qu’esperamos poder confirmar pronto”. Con esta actuación Dixebra va dar por finada la xira del trentenu aniversariu y va ponese a trabayar nos cantares del que va ser el so trabayu próximu.

Dalgunos d’ellos van poder sentise nos conciertos previstos pa primavera, onde la banda va presentar un repertoriu nuevu. “Siempre nos presta tocar cinco o seis temes nuevos en direuto enantes d’entrar al estudiu a grabar”, esplica Elipe, que cuenta con que’l discu nuevu sía una realidá pa payares del 2019.

Contador Estadistiques