“Tapia tien ganes del Festival Intercéltico y había que facer daqué esti añu”, rescampla'l direutor Fernández Cascudo

Llueu d’un añu de parón obligáu pola pandemia de COVID-19, la Banda de Gaitas Occidente retoma la organización del FID’O. “Tapia tien ganes del Festival Intercéltico y había que facer daqué esti añu”, señala Martín Fernández Cascudo, direutor d’un eventu qu’encara del xueves al llunes una edición “de resistencia”.

Conciertos, talleres, esposiciones, charres y actividaes infantiles conformen la programación del XXIV Festival Intercéltico d’Occidente (FID’O), amás d’eventos habituales como l’homenaxe a los marineros o l’alborada del mar. Nun va haber Noite Máxica daes les circunstancies, pero los conciertos internacionales caltiénense nun allugamientu nuevu.

“Dexamos la playa, pero instalamos una carpa arriba onde poder disfrutar de les actuaciones de manera segura”, esplica Fernández Cascudo. El primeru en pasar pel escenariu asitiáu onde la ilesia va ser el Calum Stewart Trio, el vienres, formación de música escocesa y irlandesa liderada pol músicu escocés que-y da nome.

Yá’l sábadu, siempre a les 23 hores, el turnu va ser pa la moza banda folk asturiana Draque, completando esta parte del festival otru tríu, Sceal, con componentes de dientro y fuera d’Asturies. L’asistencia, como ye vezu nel FID’O, ye de baldre, anque nesta ocasión l’aforu podría completase, polo que la organización anima a tapiegos y visitantes a acudir con antelación.

Izáu de la bandera celta

“La xente de la banda ta con munches ganes de festival y la xente del pueblu tamién nos los comenta. Amás, tamos notando la presencia de munchos visitantes estos díes, polo que va tar mui animao”, rellata Fenández Cascudo sobre un certame “mui familiar que permite disfrutar de la cultura y de Tapia”.

El FID’O va arrancar mañana a les 19.30 hores col izáu de la bandera celta, en presencia de l’alcaldesa Ana María Vigón y de la conceyala de Cultura, Natividad Fernández Alonso. Una hora más tarde va inaugurase la esposición sobre los vaqueiros d’alzada, coordinada por Ángel Herrera, que se va poder visitar mientres l’Intercéltico na Escuela Municipal de Música y Danza Tradicional de Tapia de 20.30 a 21.30 hores, y a les 23 la Banda de Gaitas Mariano Tapiega va actuar na carpa la ilesia.

Les neñes y neños van contar nesta edición con numberoses actividaes destinaes pa ellos, amás de xuegos nel aparcamientu del polideportivu. El vienres pela mañana, a les 11 hores, van poder trabayar el barru nun taller d’alfareria, y de tarde, a les 17.30 hores, deprender a dibuxar runes y símbolos celtes, eventos pa lo que ye necesaria la insciprición nel puestu del FID’O nel mercáu celta, qu’esti añu sal del festival pa instalase na zona del Ayuntamientu.

Stewart va poner nel Auditorio a les 19.30 hores una clase maestra d’uilleann pipe o gaita irlandesa previa al conciertu de pela nueche, primer actividá de la Escuela Internacional de Música Folk.

L’homenaxe a los marineros y l’alborada del mar

El sábadu va arrancar, a les 11.30 hores, col tradicional homenaxe a los marineros nel mirador d’Os Cañóis. L’Asociación Cultural Saíñas, de Galicia, va animar la xornada darréu, na que Julio Rodríguez va poner un clase maxistral de bouzouki a les 20.30 hores.

Otru eventu clásicu del Intercéltico, l’alborada del mar, tampoco nun va falta nesta edición. Va ser a les 12.15 hores na punta del Muelle, col posterior desfile de les agrupaciones participantes per Tapia, ente les que va tar la Real Banda de Gaitas Ciudad de Oviedo, qu’a les 10.15 hores va protagonizar na diana floriada.

La xornada va siguir a les 13 hores cola misa folclórica y, yá de tarde, a les 20 hores, con una charra nel Auditorio de Rubén Díaz. El llunes va zarrase esta edición col arriáu de la bandera celta, pensando yá na ventena quinta edición, que se quier y espera sía especial.

“Tapia tien ganes del Festival Intercéltico y había que facer daqué esti añu pa tornar a la normalidá’l que vien. Nun podíemos tar paraos otru añu más”, espresa’l direutor d’un certame mui limitáu nesta ocasión pola pandemia pa trayer bandes y agrupaciones de fuera d’Asturies. Una edición “de resistencia” na que, sicasí, sí va haber presencia de grupos de Galicia y de la zona a los que sumar artistes internacionales como Calum Stewart Trio, convirtiendo un añu más al Intercéltico de Tapia nun eventu de referencia.

Na semeya, espectacular asistencia de públicu nel escenariu de la playa del Murallón nel Festival Intercéltico d'Occidente. Imáxenes como ésta han d'esperar a ediciones próximes.