El ‘Año de Carlos Núñez’ enllena Tapia na celebración del XXV Festival Intercéltico d’Occidente

El gaiteru gallegu Carlos Núñez abre esti miércoles el XXV Festival Intercéltico d’Occidente (FID’O) con un doble conciertu que yá tien toles entraes escosaes. Per delantre queden cuatro díes d’actividaes en Tapia con un ambiente aseguráu y conciertos na playa del Murallón.

El ‘Año de Carlos Núñez’, como rescampla’l cartelu del certame entamáu pola Banda Gaitas Occidente, trai per primer vegada a esti músicu de sonadía internacional a Tapia. Una presencia que xeneró un gran repercusión, como amuesa’l fechu de que tea too vendío pa les dos sesiones programaes esta tarde, a les 20.30 y a les 22.30 hores, nel Auditoriu.

Un poco enantes, a les 19 hores, va celebrase la inaguráción na Casa Conceyo, cola presencia de l’alcaldesa Ana María Vigón; la conceyala de Cultura, Natividad Fernández Alonso; y el direutor del FID’O ,Martín F. Cascudo. Darréu va izase la bandera celta y va abrir el Mercáu Celta que va animar tol festival.

Mañana va tener protagonismu el grupu irlandés North Coast Dance Company, que va estrenar la Escuela Internacional de Música Folk a les 12.30 hores na plaza de la Casa Conceyo con un cursu de baille tradicional d’Éire, y va actuar a les 21.30 hores nel Auditorio. Los Gascones, mentes, van protagonizar la verbena nel puertu que va arrancar a les 23 hores.

Ángel Ramón Herrera va poner un cursu de baille asturianu na Escuela al meudía del vienres y Héctor Aneiros una charra sobre la flauta nel folk a les 19 hores. Esti día la formación inglesa de tradición escocesa Cambridgeshire Caledonian Pipe Band van dar animación a les 12.30 nel puertu y, pela tarde a les 16 hores, el Mercáu Celta, y van principiar a los conciertos na playa del Murallón, de vuelta nesta edición, dende les 22.30 hores, con Guieldu y Burbús.

'Homenaxe a los marineros' y 'Alborada del mar'

El sábadu a les 12 hores va celebrase’l tradicional 'Homenaxe a los marineros' nel mirador d’Os Cañóis cola participación de toles formaciones participantes. El grupu de baille L’Artusu, de Figareo, incorpórase nesta xornada con animaciones nel Mercáu Celta a les 12.45 hores y a les 19.30 hores nel puertu.

El conciertu del Murallón va tar protagonizáu por Mehaan Family xunto con North Coast Dance Company, y por Anxo Lorenzo. El gaiteru gallegu tamién va participar na Escuela, a les 19.30 hores, nesta ocasión nel Auditorio, con una charra.

Otru eventu clásicu del FID’O ye la 'Alborada del mar', el sábadu dende les 12.15 hores dende’l muelle, y la misa folclórica na ilesia de San Esteban. L’animación de la xornada nel Mercáu Celta va correr a cargu de la Banda Gaites Camín de Fierro dende les 19.30 hores, y los grupos que van tocar nel Murallón a les 22.30 hores son el tríu asturandaluz Deira y RD Folk Quartet.

Nesta xornada Deira tamién va participar a les 19 hores nel Auditorio na Escuela, actividá previa a la que va protagonziar Rubén Díaz a les 20 hores. El llunes va zarrase esta edición col arriáu de la bandera celta.

Otra manera, a lo llargo del FID’O va poder visitase na Antigua Casa de Cultura una esposición pol ventenu quintu aniversariu de certame. L’horariu de visita va ser de 20.30 a 21.30 hores, sacante güei, que pieslla a les 21.15 llueu de la inauguración prevista pa les 19.45 hores, y el domingu, que va facelo a les 21 hores.

Na imaxe, atapecer en Tapia. Semeya propiedá del Festival Intercéltico d'Occidente.