“Tamos nunos tiempos de xuntanza y de compartir idees”, asegura l'edil de Compromisu Pérez Acebal

Compromisu por Ḷḷena y Izquierda Xunida (IX), partíu qu’ocupa la alcaldía en Ḷḷena, van dir xuntos a les eleiciones municipales del 26 de mayu. “Tamos nunos tiempos de xuntanza y de compartir idees”, apunta José Agripino Pérez Acebal, edil de la formación nacionalista.

José González, coordinador d’IX en Ḷḷena, y el propiu Pérez Acebal dieron anuncia del alcuerdu eleutoral ayeri na sede d’IX. D’esta manera, dambes organizaciones tornen a dir xuntes tres dos llexislatures per separtao, yá que del 2003 al 2011, enantes de que’l Bloque por Asturies formara xunto cola Unidá Nacionalista Asturiana (UNA) la marca Compromisu, tamién se presentaron en coalición, llegando inclusive a ganar les eleiciones del 2007.

“El conciyu vivió un procesu de tresformación depués de la herencia en forma de deuda que nos dexó’l gobiernu socialista d’Hugo Morán”, recuerda Pérez Acebal d’aqueños años d’IX-BA al frente de la Casa Conceyu. Nos meses últimos dambes organizaciones entamaron contautos pa repetir esa coalición, que s’intensificó nestes selmanes hasta llegar a un alcuerdu final.

“Tamos nunos tiempos de xuntanza y de compartir idees”, apunta l’edil de Compromisu por Ḷḷena, que considera necesario “recuperar l’espíritu del trabayu en común pa frenar a la derecha y l’apaición de la estrema derecha”. Asina yá trabaya “nun proyeutu en común” con IX pa desendolcar “un plan de futuru vital pal desarrollu del conciyu”.

Llista liderada pola alcaldesa

Les dos formaciones tán agora na ellaboración del programa y na candidatura a les eleiciones del 26 de mayu, que con casi toda seguridá liderará l’alcaldesa actual, Gema Álvarez Delgado. Compromisu por Ḷḷena va ocupar puestos de salida na llista.

Na semeya, Pérez Acebal y González.