Pérez Acebal ocupa'l númberu 5 na llista d'IX y Compromisu por Ḷḷena

|
Candidatura L.lena pola Izquierda

La candidata de la coalición d'izquierda ye l'alcaldesa Gema Álvarez Delgado.

José Agripino Pérez Acebal, conceyal de Compromisu por Ḷḷena, ocupa'l númberu 5 de la llista conxunta ente la formación nacionalista y Izquierda Xunida (IX) pa les eleiciones llocales del 26 de mayu. Ésta va llevar el nome de 'Ḷḷena pola izquierda'.

L'ex conceyal de Cultura David Suárez 'Cai' tamién forma parte de la candidatura, col númberu 8, mentes que Carlos García Villamil, músicu y entrenador del Cuencas Mineras, equipu d'OK Lliga femenina de ḥoquei sobre patinos, va nel 10. El restu de posiciones van pa Izquierda Xunida (IX), con Gelos López, Rosa Morán y Jorge Fernández nos puestos siguientes a l'alcaldesa actual.

IX gobierna anguaño en solitariu en Ḷḷena colos sos 8 conceyales, mentes que Compromisu tien un representante. Nes eleiciones del 2015, el PSOE algamó 6 ediles y el PP, 2.

Gobiernu conxuntu nel 2007

Dambes fuercies yá foron en coalición ente'l 2003 y 2011 como IX-Bloque por Asturies, ganando les eleiciones del 2007 tres 12 años de gobiernu socialista. "Exemplos de la xestión de aquella época fueron la creación d'una brigada rural, que sigue en furrulamientu, p'atender a unos pueblos que taben abandonaos; la puesta en marcha del polígonu de Viḷḷayana, onde ta la principal empresa del conceyu a la que dalgunos solo ponen palos nes ruedes; la construcción del pabellón del Jesús Neira tres años de reivindicaciones; o'l cambiu na política cultural. Frutu de que los ḷḷenizos valolaron mui positivamente aquel trabayu en común ye que nes eleiciones siguientes, anque fuimos per separatao, ente les dos organizaciones tuvimos 9 de los 17 conceyales que formen la corporación", afirma Pérez Acebal, que considera que 'Ḷḷena pola izquierda' representa "la meyor opción nes próximes eleiciones municipales".

Na semeya, Pérez Acebal –terceru pela izquierda, sentáu– xunto con García Villamil, con Cai detrás del entrenador del Cuencas Mineras.

 

Contador Estadistiques