"Tamos ablucaos cola postura del PP sobre'l cartelu", apunta Cai

L'edil de Compromisu recuerda que los populares sofitaron la ordenanza del 2015 y camienta que siguen la llinia marcada dende la direición n'Asturies, col exemplu de Mieres.

"Nun hai nengún tipu de discutiniu en Ḷḷena col usu del asturianu", entiende David Suárez 'Cai', conceyal d'Educación, Cultura y Política Llingüística, qu'amuesa la so sorpresa pola postura de PP llocal sobre'l cartelu del Antroxu, que se celebra esti sábau en La Pola. "Tamos ablucaos", señala, al tiempu qu'espresa "que nun sabemos qué ye lo que nun entienden, si la pallabra 'Antroxu' o 'carroces".

Cai esplica que sí esiste un consensu pa que'l castellanu apaeza nos cartelos que s'editen dende'l Conceyu, pero apunta a "una cuestión téunica que permite la ordenanza" a que nesti casu concretu s'emplegara l'asturianu". "Ye pocu testu y entendible, nel que utilizamos la variante llocal del idioma. Asina aforramos doblar cartelos y aumentar gastos. Cuando sí esiste un testu llargu o que pudiera ser más complicao d'entender, como l'axenda del Vital Aza, va siempre billingüe", defende.

Sobre la posición amosada agora pol PP camienta que podría tar detrás de la estratexa del partíu amosada na Xunta Xeneral o Mieres de que l'asturianu nun s'entiende. Asina apunta que nel 2015 los populares sofitaron la ordenanza d'asturianu, aprobada por unanimidá, pa garantizar el derechu de la ciudadanía a dirixise a l'alministración llocal en llingua asturiana, y que namái hebo conflictu sobre l'idioma de manera esceicional en tiempos pasaos.

"Estes situaciones amuesen que ye urxente que l'asturianu sía declaráu llingua oficial, qu'esista un marcu xurídicu a nivel d'Asturies que fomente la presencia del idioma y evite estos ataques", demanda.

Na imaxe, portada de l'axenda cultural de Ḷḷena pal mes de marzu, na que conviven l'asturianu y el castellanu.