Suspéndese'l serviciu d'autocares al aeropuertu

El Gobiernu toma esta midida énte'l descensu del tráficu aereu en Santiagu'l Monte.

Dende mañana van suspendese tolos servicios de tresporte públicu n'autocar al Aeropuertu d'Asturies dende Uviéu, Xixón, Avilés y Castrillón. Ésti va retomase nel momentu nel que se recupere la normalidá tres la pandemia declarada de COVID-19, que caltién n'alarma a tol Estáu.

Dende la selmana pasada asocediéronse les cancelaciones como consecuencia de la crisis sanitaria qu'impón la reducción tanto de les operaciones como de la ocupación media de los aviones. El númberu d'usuarios baxó del cuasi'l 90 por cientu d'un periodu normal al 27 por cientu del domingu.

Los axustes

Les compañíes qu'operen n'Asturies viéronse obligaes a facer axustes énte esta situación esceicional. Asina Vueling, que tenía programes 36 frecuencias selmanales preve una operativa llendada na ruta con Barcelona baxo revisión diaria, col siguiente vuelu programáu pal llunes.

Air Europa, que reduxera la conexón a Madrid de 4 a 2 vuelos, va anular esta llinia de manera temporal dende mañana. Pela so parte Iberia, qu'opera hasta 5 vuelos diarios cola capital del Estáu, dexará 1 o 2 dende mañana, y Volotea suspendió la mayor parte de los viaxes en marzu.