SUATEA convoca al profesoráu de Llingua Asturiana a una asamblea pa tratar la situación a la que s’enfrenta la materia en Bachilleratu

La “agresión” que vive la materia de Llingua Asturiana en Bachilleratu cola propuesta de borrador de currículu de la conseyería pa esta etapa educativa lleva a SUATEA a convocar a los maestros a una asamblea. Ésta va tener llugar el miércoles nel IES Aramu d’Uviéu y va preceder a otra xeneral pol fechu de que “la situación de degradación de la materia ye compartida con otres”.

“Los borradores de decretu pelos que se regula n’Asturies el currículu d’educación secundaria (ESO y Bachilleratu) tán suponiendo una nueva agresión a la presencia de la llingua asturiana y del gallego-asturiano nel sistema educativu asturianu”, afirmen dende’l Sindicatu Unitariu Autónomu de Trabayadores de la Enseñanza d’Asturies (SUATEA). La idea de la Conseyería d’Eduación, Cultura y Deporte ye somorguiar la materia “nuna montonera d’asignatures optatives, lo que torga la so escoyeta per parte del alumnáu” y rebaxar les 4 hores selmanales d’anguaño a 1. “Nun fai falta desplicar la barbaridá pedagóxica que supón una asignatura, y amás en bachilleratu, de la que namás s’imparte una hora a la selmana”, espón el sindicatu educativu.

Otra torga que vive la materia de Llingua Asturiana y Gallego-asturiano ye la permanencia de los ratios, ensin escaecer la obligación al alumnáu que garre l’asignatura nos cursos superiores “a tenela estudiada nos anteriores. Teniendo en cuenta que la materia d’asturianu sufre constantemente, y hasta bien avanzáu’l cursu, que-y saquen alumnos pa otres materies, o que directamente nun se los dexe matriculase por tener que facer hores de refuerzu n’otres materies, topámonos con que podría dase la situación de qu’un alumnu o alumna pase los cuatro años de la ESO ensin poder cursar l’asignatura queriendo facelo toos ellos”. Una situación, poro, esmolecedora que lleva  a SUATEA a convocar al profesoráu de l’asignatura a una asamblea nel uviedín IES Aramu pal miércoles a les 17.30 hores. Darréu, a les 18.30 hores, ta prevista otra xeneral pa tratar la situación d’otres materies degradaes nel borrador del currículu.

“Con una llexislatura a piques de rematar, la conseyera n’exerciciu, Ana González, paez querer despedise del sistema educativu asturianu dexando’l mesmu mal tastu que dexaron los sos antecesores no que toca a la llingua del país”, sentencia SUATEA.

Munches crítiques

El borrador del currículu presentáu a los centros educativos pola conseyería pa la entrada de la Llei Orgánica de Meyora de la Calidá Educativa (LOMCE) xeneró una corriente de critiques a lo llargo de tola selmana. El primer coleutivu en denunciar la situación foi Iniciativa pol Asturianu, qu’esixó a González “que retire de manera inmediata esti borrador de currículu y que dexe a l’asignatura de Llingua Asturiana polo menos nes mesmes condiciones (yá negatives) que tenía hasta agora en Bachilleratu”.

El Círculu de Derechos Llingüísticos de Podemos fala tamién d’un “ataque frontal a los derechos de la sociedá civil asturiana”, y amuesa’l so refugu “a les intenciones del Gobiernu de la FSA”, al que demanda que “rectifique nesti borrador” y “cumpla col compromisu alquiríu pola conseyera d’Educación de la creación, na actual llexislatura, de la Especialidá docente de Llingua Asturiana porque, de lo contrario, l’asignatura, y polo tanto, el derechu de les y los alumnos de los centros educativos asturianos, cuerren el riesgu de desaparecer al tar a espenses de les polítiques partidistes que se vienen llevando alantre polos sucesivos gobiernos estatales”.

Pela so parte, l’Asociación de Trabayadores de la Normalización Llingüística califica de “escomanáu y malintencionáu” esti recorte propuestu nes hores de la materia nuna etapa educativa “yá condenada a númberos mínimos pola imposibilidá d’apaecer como materia evaluable na PAU y que yá contaba, pa más, con una ratio esixida pa impartila”. Esti coleutivu critica que González, cola posición que ta amosando con respeuto al idioma nel sistema educativu, dende la Educación Infantil al Bachilleratu, nun tien otru enfotu que “desprestixar, arrasar y sentenciar de muerte una intervención educativa necesaria dafechu nel procesu de recuperación y sobrevivencia d’una llingua; arrastrando con ello al desamparu total a too un coleutivu d’enseñantes que, d’equí a bien poco, ta condergáu a desapaecer”. “Nun ye tiempu de mázcares; ye momentu de destapase y de dicir a la sociedá asturiana qué quier el Gobiernu d’Asturies pa cola llingua asturiana. Y asina, pidimos que se retire esti borrador de currículu y se trabaye por desarrollar una educación pal asturianu digna y propia del valir de cualesquier llingua”, finen los trabayadores de la normalización nun comunicáu.